Aizawl: Hachhek Bial MNF Joint Block leh Youth Block hruaitute chuan Inrinni khan Tuidam leh Darlak inkar kawng siam mek a hmunah an enfiah a. Kawngpui chhiat chhan chu Mizoram sorkar leh Contractor te puhin, ngaihdan dil turin an phut.
Kawng endiktute hian central sorkar atanga sum awm fel tawh leh thal hun tha liam tawh mah se, Contractor-te inthlahdah avangin tun thlengin hnathawh zaa pakhat pawh a la awm lo tiin, PWD Minister leh a hnathawk tu Contractor HES India Private Limited-te chu khawthlang mipuite hnena ngaihdam dil tura an phut.
MNF hruaitute chuan he kawng hi August 29 khan an bialtu MLA Robert Romawia Royte pawhin lo enfiah tawhin, Contractor Site Manager nen lirthei tangte pui tura JCB duty dah dan tur an lo sawiho tawh tih an sawi a. Inrinnia an enfiahnaah hian Contractor-in JCB duty a dah leh dah lohte enfiahin an sawipui a. Darlak leh Tuidam inkar km 8 pawh tling lo, One Time Improvement (OTI) Project hi August 11, 2025 atanga sanction tawh niin, PWD-in kumin January 23 khan HES India hnenah hna hi a hlan a; amaherawhchu January atanga May inkar thal hun tha chhung zawng khan eng hna mah thawh a ni lo tiin an dem a ni.
Kumin March thla daih tawh khan zaa 70 zawh hman tura ruahman a nih laiin, tun thlengin hnathawh engmah a la awm meuh lo va, fur pui chhungin mipui leh lirthei tlante an buai nasa a. Sum awm sa reng chunga Mizoram sorkara PWD Department leh Contractor-te inthlahdahna leh muan lutukna avanga mipuite harsatna tawk ta chu pawi an tih thu an sawi bawk.