Aizawl: Sports Minister Lalnghinglova Hmar chuan ‘Empowering Mizoram Sports’ hmalakna hnuaiah Lengpuia Mizoram State Sports Council (MSSC) hmunah thalkah zirna changtlung tak, Archery Academy din a nih dawn thu a sawi.
He project atan hian Rs vbc 13.28 hman a ni dawn a, a sakna tur sum hi National Thermal Power Corporation (NTPC) chuan Corporate Social Responsibility (CSR) fund atangin a tum dawn niin a social media Instagram-ah a tar lang.
Sports Minister chuan thalkah hi India ram tana khawvel huapa lan theihna tur indiamna nia an ngaih avangin Mizoram sorkarin a ngaihpawimawh zinga mi a nih thu a sawi a. Project DPR pawh MSSC chuan a thehlut fel tawh a, June 26 khan NTPC lam pawhin an lehkha hi an lo pawm tawh avangin hna thawk tan thei tura buaipui ngaite kalpui mek zel tih a sawi.