Aizawl: Inter-State Border Festival leh ramri hrula remna leh muanna a awm zel theihna tur chungchang sawi dunin Kolasib Bawrhsap H. Dolianbuaia leh Cachar Bawrhsap Rahul Kumar Gupta te an inkawm.
Thawhlehnia Cachar DC Conference Hall-a an inkawmnaah hian kumin October 30-a Vairengte-a neih tur ‘Inter-State Border Festival’ buatsaih dan tur bakah, ramri hrula cheng mipuite thlamuang taka an awm theihna tur te, ruihhlo dona kawnga thawhho zel dan tur te leh hmasawnna kawng hrang hrang a taka kalpui dan tur te an sawi dun a ni.
Vairengte-a Inter-State Border Festival neih turah hian infiamna hrang hrang — Futsal, Badminton, Volleyball leh Table Tennis infiamna buatsaih a ni dawn a; hnam lam entirna awmin ATMA leh MZSRLM atangin stall te pawh hawn a ni ang.
District pahnih bawrhsapte hian he festival hi inpawhna leh muanna thlentu a nih theih nan theihtawp chhuaha thawhho an tiam a ni.
Hemi hmunah hian Kolasib District SP Lalrinpuia Varte leh Cachar SP Partha Protim Das te pawh inhmu nghalin, ramri hrula dan kenkawhna (law enforcement) leh ruihhlo tawlhruk dona kawnga police-te thawhho dan tur an sawidun bawk.
Kolasib bawrhsap hi Lalmuanpuia (DRDO), David A. Lalhmingchhuana (DIPRO), Dr. Benjamin Lalduhawma (PD ATMA) leh official dangten an tawiawm a ni.