Aizawl: Thawhtanni zan dar 8:30 bawr vel khan Phaisen Check Gate-ah Vairengte Police-ten Mizoram atanga Assam-a phurh luh tum Methamphetamine ni ngeia hriat, Rs nuai 320 hu, kg 3.910-a rit an man.
He ruihhlo man chungchangah hian Police-te chuan ND&PS Act hnuaiah thubuai an ziak lut nghal a, ruihhlo phurhna lirthei bakah a chhunga chuang passenger pakhat an man zui bawk.
Vairengte Police-te hian Phaisen Check Gate-a dan pangngai anga motor enfiah hna an thawh laiin, Mahindra Scorpio var, Assam mi Habibulah khalh chu Assam lama haw thlak tumin a ding a. Police-ten en fiah tura lirthei atanga chhuk tura an tih rualin a khalhtu hi a tlan chhe nghal a ni.
A khalhtu tlan chhiat tak avang hian thil dik lo phurh a nih ringin Police-ten lirthei hi an enfiah zui a, a kawngkhar hnung zawk atangin Methamphetamine ni ngei a hriat kg 3.910-a rit hi an hmu chhuak ta a ni.
Lirthei chhunga chuang passenger, Guljar Hussain (23), Karimganj, Assam mi pawh a tlan chhe zui a, amaherawhchu Police-ten umzuiin an man a ni.
Vairengte Police Station-ah ND&PS Act hnuaiah thubuai hi ziak lutin, ruihhlo man bakah he lirthei leh passenger Guljar Hussain te hi Police-ten an zui ta a ni.