Aizawl: Administrative Training Institute (ATI), Training Hall-ah Combined Civil Service Officer thar 34-te tana September 8 atanga October 30, 2026 thleng neih tur, ‘Basic Foundation Training Course’ chu Thawhlehni khan Adviser to CM (Finance & Planning) TBC Lalvenchhunga’n a hawng.
He training hi riak luta kalpui tur a ni a, hawnna inkhawmah hian Adviser chuan officer tharte hi mahni phu avanga tling an nih avangin hna thawhnaah mipui dah pawimawh ber tur leh, dikna leh dan chhungah ngei ding tlat turin a chah a ni.
TBC Lalvenchhunga chuan sorkar hnathawkte chu democracy-a mawhphurhna pawimawh tak nei an nih avangin office leh lalna nuam tia mawhphurhna hlamchhiah site chu officer hlawhchham an nih dawn thu a sawi a. File tinreng phenah mihring nunna a awm tih hriat renga thlemna hrang hrang laka dik ngam turin a chah bawk.
Mahni thawhna ram chhung hre chiang tura zin chhuak tam tur te, Artificial Intelligence (AI) rin lutuk a him loh avanga mahni thiamna leh hriatnate hmasawn tir zawk tur te, leh mahni khawvela inchar tlat lo va mipui tana hnuhma tha hnutchhiah zawk turin officer-te hi a chah bawk.
Hawnna inkhawm hi ATI Joint Director (Training) Lalrimawii Hmar-i’n a kaihruai a, ATI Director Rita Lalnunmawii Pachuau pawhin thu a sawi.