Zoram People’s Movement (ZPM) chuan an party dan (constitution) siam thain chief minister tan party president nihna chelh kawp an pawm.
Thawhlehnia Dawrpui Multipurpose Hall, Aizawla ZPM General Headquarters Executive Committee Meeting vawi 9-na, president mawhphurhna latu VL Zaithanzama kaihhruaia neihah ZPM party hruaitu mi 12-in hei leh chen an lo kalpui tawh dan leh party hmakhua an thlirin chief minister-in nihna a chelh kawp theihnain party tan hriselna leh thil tha zawk a thlen an beisei thu rawtna an siam chu an sawi ho hnuah ZPM Constitution Article 21-na, ‘Nihna leh Mawhphurhna’ tih hnuaia Point No. 1 — ‘Minister leh party Elected Office Bearers nihna chelh kawp theih a ni lo ang’ tih chu ‘Chief minister-in party Elected Office Bearers a chelh kawp thei ang’ tiin an tidanglam a. Chief minister tih loh minister dangte erawh elected OB chelh kawp loh nise tiin an pawm a ni.
ZPM Leader, Chief Minster Lalduhoma chuan a mi mal ngaihdanah chuan party president leh chief minister nih kawp chu tha a tih loh thu a sawi a. Party inlungrualna chu chakna thahrui a nih avangin party rorelna tlu tawh chu a pawm zel tur thu a sawi a. Committee hmasain party elected OB-te ruatna chu Val Upa Council (VUC) kutah an dah tawh avangin tuna dan an thlak avang hian amah chu president atan an ruat ngei tihna a nih loh thu a sawi.
K. Sapdanga pawhin thu sawiin ZPM-in leader an nei a, an leader ber party hruaitu nih khapna danpuia an nei chu a tha lo va, kawng hawnsak chu a tha a tih a sawi a. Hetihrual hian, party pisa luah lum thei lo hlir dahkhawm chu party tana a that loh avangin minister dangte kawng hawnsak ve kher a tul lo tih a sawi a. Mipuiin ZPM chu sorkar zel tura an beisei avangin, hei hi a thlen theih nan party chhung inlungrualna an mamawh hle tih a sawi bawk.
August 26, 2026-a Executive Committee meeting lo neih tawhah khan party elected OB-te chu VUC-te kutah ruat theihna a lo dah tawh bawk.