- Dr. JTVL Ngheta
Ka hmelhriat hnai tak hian chawhmeh leia bazara kal nana 2wheeler taxi a hman châng hian Zonuam atanga Vaivakawn hi Rs 70 a pe thin a, Sorkarin order thar a tih chhuah hnuah hian Rs 50 a pe ta thin tih a sawi.
Ro relna dik thlentir a tumna kawngah hian ZPM Ministry hi huai takin kal zel rawh se, nakinah kan la nihlawh phah dawn a ni. Chutih laiin, Opposition-ho hi ngawi dûk bîk lovin, sawrkar hma lak mekna hi tha an tih thu te pawh puang chhuak ve zel teh se.
Chutih laiin, dan bawh chhiatna dang awm theite pawh uluk zawka en ni zel thei se:
Legal Metro-hote leh Centre for Consumer Education tang rualin an inspect tuma ka tal venaah chuan dawrkaite hian an ti tha tlangpui a, a lawmawm khawp mai. MRP pel lo chu thu hran, a aia tlawma hralh te hi an awm nual a ni; MRP aia tlawma hralh hi danin a tum tak chu a ni zawk a.
Motor parts zuarte zingah hian MRP aia toa zuar an la awm em nit Social media lamah sawi a awm a; an lo awm a nih chuan, Consumer Protection Act thu awihin a nih dan turin hralh ni zel rawh se, ringtute kan nih theuh hi. Tin, Filling Station-te pawh hi an fair tawk em tih te hi uluk zawka inspect a ngai ang emt Hei pawh hi media lamah sawi a awm a; A hma aia fimkhur leh uluk zawkin dawr leh mipui tana service thin zawng zawngte hi inspect ni se. Pump neitute hi inspect neih dawna lo hrilh lawktu an awm thin emt Social media-a an sawi hi a dik a nih chuan law enforcement hotute tan a zahthlak a, chona a tling ang; a thena ni sa, a thena ruah sur lova thil a kal theih nan, ruling leh opposition party-te an tan mar pat a ngai; thil tha duha an tanrual a, thil tha duh lo tlan tau an awm a nih pawha eng party mahin an lo chiauau bîk loh a ngai; kan tan rual phawt chuan, tun aia ram nuam, Canaan ram nuam hi Zofate hian kan la thleng ngei dawn a ni tih hriain i tang rualin i insiam tha sauh sauh ang u.
Gas te pawh hi in tinin an tla khawp an hmu em tih te hi kan hre chiang emt Ruling leh opposition-te hian in tinah lutin zawt chhuak vek se an chiang mai ang; inthlan dawna thil tha tih tum leh social media-a mahni party that bikzia au chhuahpui ringawt hi a taka hlen chhuah a nih si loh chuan a tawk lo ve; theih tawpa tan lain, han thawk chhuak teh se. Ei rawng bawlna Gas kham khawp lo chhungkua hi an la tamin a lang tlat a ni. Kan lo thlir reng e.
Ti hian tan bik emaw, sâwt bik emaw nei lovin ka’n sawi ta chiam a, thahnem ngaihna aw a ni tih hriain kan lo hre thiam theuh dawn nia.