Reh deuh vang vang mah se, reh hlen an tum lo.
Kimkimi and The Projects band hian kum khat zen zawn chu hla thar an nei tawh lo. Mahse, reh chhan tha tak an nei. An reh chhan maw — an vocalist leh band dintu ber Kim Kimi hian taksa lamah harsatna neiin, kumin chu a tho chhuak meuh lo a tih theih.
Blue Corn member thin, Kim Kimi hi nikum November atang khan damlohnain a tlakbuak a. LRM damdawi inah a spinal cord zai a ni a; nikum vek, December thla tawp khan a vawi hnihnan Civil Hospital, Aizawl-ah zai a tawk leh a. Krismas leh Kum thar pawh damdawi inah a hmang a ni.
Hemi hnu, kuminah pawh a dam hleih theih loh avangin Zoram Medical College & Hospital (ZMC&H)-ah hun rei tak enkawl leh a ni a. That lam a pan theih meuh loh avangin, Delhi panpui a nih hnuah hlawhtling taka zai a tawk leh a ni.
Kumin chhung zawng chu khum beta a dam loh hnuah, tunah hian a thu chhuak thei tawh mai ni lovin, kal pawh a kal thei sawt viau a. In lamah inenkawlin hma a sawn tawh hle a. Hei hi band tan pawh a ri a mawi a, tunah chuan rimawi lam pawh a hawi thei tan tawh a ni.
Hetia hma a sawn viau hnuah, band lam pawh a rilruin a hawi chho ta a. Hla pawh an nei reng tawh a, recording chiah an hmabak a, harsatna dang an nei lo a nih chuan kumin ‘ber’ thlaah chuan an tan theih pawh a inbeisei tawh a ni.
Kim Kimi chuan, “Kan keyboardist Rinhlua leh bassist Tea te hi Thenzawlah music school an va din a. Duh angin kan jam ngun thei lo va. Kei ka lo damlo bawk nen. Mahse, kan intuk khawm mek a, kan puitlin thei tep. Hla chu kan nei reng tawh. Record chiah kan hmabak. September atang chuan full concentration kan pe thei tawh ang,” tiin Thalai Times a hrilh.
Mizo hmeichhe pop-group hlawhtling bera chhal ngam, Blue Corn vanglaia ‘Angel Corn’ tia sawi thin, Kim Kimi hian an hmeichhe group lam dah thaa mal zai anga a kal zet hnuah, band angin project a nei a. Nikum khan dinin — Kimkimi and The Projects — tiin an invuah a. Band angin mipui hmaa an zai hmasak ber chu, nikuma Dawrpui Vengthara restaurant lun leh lar tak ‘Donum Dei’ ah khan a ni.
Original line-up ang chuan acoustic band angin an kal hmasa zet a. An kal rei hret a, band member inthlak awm bawk nen, rimawi chhepchher chikim zawkin, full-fledge live band angin an kal leh ta zawk a ni.
Kim Kimi and The Projects — band hian nikum August thla khan an single hmasa ber — Damchhung — an tichhuak a. Blues rawngkai a ni. He hla hi Kim Kimi phuah a ni nghe nghe.