Aizawl: Excise & Narcotics Department leh Kolasib Venglai East Branch YMA thawkdun chuan Nilaini zan dar 10 khan NH 306, Kolasib Venglai East-ah Assam atanga phurh luh zu thahnem tak leh a phurtu mi pahnih an man.
Zu mante hi Indian Made Foreign Liquor (IMFL) 750ml case 150 (bottle 1,800) leh Canned Beer 500ml case 50 (can 1,200) te an ni a. A phurh nana hman TATA Hyva Tipper (AS11E-4260) an man nghal.
A neitu leh a phurtu nia puh mante hi Parul Hussain Laskar (24), Rajnagar, Bagha Bazar leh Saruk Ahmed Bharbuiya (26), Satyagaram, Bagha Bazar, Cachar District, Assam an ni.
Excise & Narcotics Department hian Ningani zing dar 3 khan Bung Bungalow vengah truck atangin zu – IMFL (750ml) case 267 (bottle 3,204) leh Canned Beer (500ml) case 280 (can 6,720) an man leh bawk.
Excise & Narcotics Department chhinchhiah danin January, 2026 atanga September, 10, 2026 thleng khan rakzu liter 50,592.024 leh FML (Foreign Liquor) liter 52.600 bakah heroin kg 18.489, methamphetamine kg 68.138 leh Crystal Meth kg 11.531 an man tawh a ni.