Aizawl: Health Minister Lalrinpuii hovin Legislative Forum on HIV/AIDS an thukhawm a, HIV positive rethei zualte tanpui nan MLA tinten Rs. 50,000 thawhkhawm leh turin thutlukna an siam.
Ningania Mizoram Legislative Forum on HIV/AIDS, SAD Conference Hall I, MINECO-a thutkhawmah Health Minister Lalrinpuii chuan, MLA-te chu thisen test tura mipuite tihhmuhtu nih tuma, mahni ngei thisen test turin a sawm a; an thusawiah pawh a tam thei ang ber thisen test pawimawhna leh HIV kai an lo awm palh pawhin a rang thei ang bera ART damdawi ei nghal a tul thu uar taka sawi thin turin a chah.
District tina constituency hrang hrang MLA te chu tangho a, convener te insiam a, thutkhawm fo tha a tih thu Health Minister chuan a sawi a; bial fan nikhua pawhin HIV awareness neih dan kawng dap zel turin MLA-te a sawm a ni.
Mizoram State AIDS Control Society (MSACS) Project Director Dr. Jane Rinsangi Ralte report pek danin, October, 1990 atanga June, 2026 thleng khan Mizoramah HIV positive hmuhchhuah 34,745 an awm tawh a, Mizoram chu India rama HIV prevalence rate sanna ber (2.85%) a la ni reng a ni.
Hmasawnna awm mek tar langin, NACO hmalakna ‘Mobilization for AIDS Suraksha’ (MAS) hnuaiah August 2026 thlenga target ‘Surakshit’ (95-95-95) pha awmchhun chu Saitual District an ni a, Khawzawl, Hnahthial, Mamit, Champhai, Serchhip leh Kolasib district-ten ‘Saksham’ dinhmun thlengin, Siaha, Lawngtlai, Lunglei leh Aizawl district-te erawh ‘Sangharsheel’ dinhmunah an la awm thung.
He thutkhawmnaah hian HIV positive rethei zualte tanpui nan MLA tinte’n Rs. 50,000 thawhkhawm leh tura thutlukna siam a ni a. Hemi piah lamah naupaiin a faa HIV hrik a kaichhawn lohna tura EID test-na khawl (Cepheid Xpert HIV-1 Qual XC) chu CSR atanga ngaihtuah dan zawn nise tih a ni bawk.
Thutkhawmah hian MLA paruk — Adviser to Chief Minister Lalmuanpuia Punte, Adviser to Chief Minister TBC Lalvenchhunga, VL Zaithanzama, Lalchhuanthanga, T Lalhlimpuia leh K Hrahmo te an tel a ni.