Aizawl: Ruah sur nasat avanga Katakhal leh Bairabi inkar rel kawng chhia, metre 70 zeta thui chu Northeast Frontier Railway (NFR) chuan ni 10 chhungin rim taka thawkin an siam tha a, Pathianni atang khan a pangngaiin rel a tlan leh tan.
Tun thla tir, September ni 3 khan Jamira leh Bairabi inkarah hmun hnihah leimin leh lei tawlh avangin metre 70 zeta thui rel kawng a chhiat avangin rel tlan hi tihtawp lailawk a ni. NFR thawktute chuan khawchin leh hmunhma khirhkhan tak karah chhun zan zawmin hna an thawk a, ni 10 chhungin hlawhtling takin kawng chhia hi an siamtha leh ta a ni.
Kawng siamthat a nih hnu hian September ni 12 tlai khan enchhinna (trial run) hlawhtling taka neih nghal a ni a, Train No. 55669 (Silchar-Sairang Passenger) chu him takin a tlantir chhin a ni. Rel tlan hun tur (schedule) leh a dinna tur hmunte hi IRCTC website leh NFR social media platform-ah te tarchhuah a ni tawh a ni.