Aizawl: Mizoram Merchant Association (MIMA) General Headquarters chuan an pisa-ah income tax department atanga lehkha hmu leh buaina tawkte kokhawmin ruahmanna an siampui a. He hunah hian chief secretary hluim Vanhela Pachuau leh thingtlang lam atanga kalte thlengin mi thahnem tak an kalkhawm a ni.
Income Tax Department-in Mizote hnam bika tax pe tur ni lo (tribal exempt) reng chunga lehkha an thawn thin chungchangah MIMA chuan Income Tax hotu lian Principal Chief Commissioner of Income Tax (Guwahati, North East Region) leh Chief Commissioner-te vawi hnih lai an sawipui tawh bakah, lehkha te thawnin Mizorama Income Tax Office-ah te pawh an lo sawipui tawh a ni.
Income tax atanga lehkha hmute Silchar-a an thawn kher ngai lo va, helai hmun atanga lo chinfel saktu tur qualified officer pakhat ruat tura an dilna chu income tax hotute pawhin hma an laksak mek thu lehkha a dawn a ni bawk.
Kalkhawmte hnenah hian income tax atanga lehkha an hmuh te chu document ngaite nen chhang zel tura hrilh an ni a. Hemi chungchang hi MIMA Joint Secretary Lalrammuana, Dawrpui chuan computer leh video hmangin a zirtir nghal a ni.
Hetianga an chhan hnu pawha Assessment Year inang renga lehkha la hmu chhunzawm zel an awm a nih chuan MIMA-ah report leh turin an inhriattir a ni.
MIMA chuan he Income Tax harsatna hi sorkar, all NGO leh political party tinte inhmukhawma tangruala hmalak ngai a ni tih tar langin resolution an pass a. Tun ang renga he department hian a tibuai reng a nih chuan mipuiten Chartered Accountant (CA) rawih nan pawisa thahnem tak an seng reng dawn avangin, MIMA-in sawihona (consultation meeting) a buatsaih leh hunah sorkar leh pawl hrang hrangte inhawng taka tel turin ngenna an siam nghal bawk.