Food, Civil Supplies & Consumer Affairs (FCS&CA) Minister B. Lalchhanzova pisa-ah Thawhtanni khan Indradhanush Gas Grid Limited (IGGL)-in Tripura-a Panisagar atanga Sihhmui, Mizoram thlenga natural gas kalna tur pipeline phum chungchanga hmalakna leh harsatna awmte sawi ho.
Minister B. Lalchhanzova chuan khawvel boruak ralmuang lo leh gas supply-tu ramte indo avangin ei rawngbawlna gas-ah Mizoram mipuite an phang a; amaherawhchu, gas pipeline hmang thin state-te erawh chuan harsatna an tawk ve lo tih a sawi a. Mizoramah pawh he harsatna hi sukiang turin March, 2027 chhunga natural gas hmang ve hman tura hmalak mek a nih thu sawiin, Tuidam leh Darlak inkar km 1.5-a IGGL-te hnathawh meka harsatna awm chu October thlaah ama ho ngeiin IGGL, FCS&CA Department, PWD leh Mamit district bawrhsapte nen a hmunah en tura ruahmanna siam tura chah a nih thu a sawi.
Minister chuan sorkar thil tum leh IGGL gas pipeline phum hna chu a hun takah zawh a nih theih nan Mizoram sorkarin theihtawp a chhuahpui zel dawn tih a sawi a. FCS&CA leh Commerce & Industries Department-te an inhawn rualin, ram mamawh chungchanga land acquisition thilte pawh a rang thei ang ber a fel taka chin felsak an nih thin thu leh hmalakna dangte pawh um zuisak zel an nih tur thu a sawi bawk.
Thawhtanni vek hian B. Lalchhanzova pisa-ah hian Land Revenue and Settlement Department hotute chu thukhawmin LR&S Dept. hmalaknate an thlir hova, department hmachhawp te an sawi ho bawk a ni.