Aizawl: Mizo National Front (MNF)-in hruaitu thar an ruat a, working president pakhat leh vice president pahnih ruat an ni.
An party chak zawk leh tluang zawka a kal zel theih nan tiin President Zoramthanga’n a thuneihna hmangin office bearer tharte a ruat a, Working president-ah dy. chief minister hlui, Tawnluia ruat niin vice president-ah home minister hlui, Lalchamliana leh MLA hlui, D. Thangliana te a ruat a ni.
Thawhtanni chawhma dar 11-a MNF Hnam Runa chhung inkhawm leh political session neih a nih tuma puan chhuah a ni.
President Zoramthanga chuan MNF Constitution Bung 3, chang 21B (xv)-in thuneihna a pek angin hetiang hian party hmasawnna leh tluang zawka hma a lak zel theih nan hruaitute hi a ruat a ni tih a sawi.
MNF president chuan ZPM-in an party general headquarters inthlan an huphurh hle tih sawiin, inthlanna neih an tum lo va, vice president pawh eng emaw zat an ruat belh tawh a, Congress pawhin inthlanna neih buai loin vice president-te an inruat belh tih a sawi a. MNF pawh inthlang ta se, elected OB thar, NCC, PAC, adviser, GS, secretary leh frontal zawng zawng a vaia inruat thar a ngai dawn a. Promotion beisei nei mi tam tak an tikhaihlak thei a. Term dangah pawh an lo tih thin fo tawh angin tih a ni tih sawiin, nakkum hi party inthlan hun tur ni mah se, MLA general election hnaih tawh chhunga inthlan neih hi thil hmachhawn harsatna tam tak a thlen theih avangin election zawhah inthlanna hi neih zawk a nih tur thu a sawi a. “Party dang pawhin an ti a, keini pawh kan constitution-in president thuneihna a pek angin kan party chak leh zuala a kal theih nan kan inruat thar a ni,” a ti.