Lok Sabha MP Richard Vanlalhmangaiha’n Aizawl Press Club tlawhin Mizoram Journalists’ Association (MJA) hruaitute nena an inkawm a, MP fund dik leh daihzai taka hman a tum thu leh Mizoram tan sum pawt chhuak tura theihtawp a chhuah zel tur thu a sawi.
MJA sawmna angin Richard Vanlalhmangaiha chuan Thawhlehni khan Aizawl Press Club tlawhin MJA President Vanlalrema Vantawl hovin an inkhawm a. MP chuan amah chu ZPM party mi ni mah se, Mizoram mipuite zawng zawng MP a nih thu sawiin, ram chhung hmun hrang hranga Kristianten harsatna an tawh chang pawha a theih ang anga hma la thin tura Kristian MP 22-te an inhmuh khawm thin thu a sawi.
Richard Vanlalhmangaiha chuan sorkar laipui dawrnaah inthianthatna hmanga fund pawh chhuah tur a tam thu leh Mizoram chanpual bakah sum tam thei ang ber pawt chhuak tura hmalak a tum thu a sawi a. MP a nih hnua a hmalakna zarah Mizoram sorkarin sorkar laipuia project pending Rs vbc 668.52 hu leh PMGSY-I hnuaia project tihtawp tawh hawn thar lehin GST liability Rs vbc 150 vel pek chhuah a ni tawh tih a sawi a. NH-306A Vairengte – Vaitin inkar kawng siamna tur Rs vbc 99.78 pawh tun hnaiah pek an nih bawk thu a sawi.
Parliamentary Standing Committee on Finance member atana ruat thar a nih thu sawiin MP chuan MP fund hman kawngah dik tak leh daihzai bera kal a tum a, tunah pawh Mizorama khaw 94-a zirna in hrang hrangah fund pe tawhin mipui tam thei ang berin an chhawr zui zelna tura hmalak a nih thu sawiin, ram leh hnam tan theihtawp a chhuah zel tur thu a sawi a ni.