Aizawl: Urban Development & Poverty Alleviation (UD&PA) Minister K. Sapdanga chuan khawpui hmasawn zela eizawnna leh ni tin khawsak chungchanga harsatna lo awm thin hmachhawn dan tur ruahmanna ‘City Livelihood Action Plan’ (C-LAP) chu Thawhlehni chawhnu khan a pisa-ah a tlangzarh.
He plan hi UD&PA department leh Pachhunga University College (PUC) Economics Department-te thawhhona thuthlung siam anga buatsaih a ni a. Minister chuan khawsak harsa zawkte leh eizawnna mumal neilote hmakhua ngaihtuah chu UD&PA department mawhphurhna a nih thu sawiin, C-LAP-a data tangkai tak takte chu sorkar hmalakna leh documentation atan a hlu tak zet tih a sawi.
UD&PA Director Jacob Lalawmpuia leh C-LAP Research Associate Dr. K. Vanlalhruaitluanga te tar lan danin, he zirchianna hi sorkar laipui Ministry of Housing and Urban Affairs (MoHUA) ruahmanna anga buatsaih niin, Aizawl khawpui chhunga mihring leh eizawnna dinhmunte fel takin a tar lang a ni.
Zirchianna atanga a lan danin, Aizawl khawpuia hnathawh nei mek zingah zaa 47 chu mahni hna thawka eizawng an ni a, mi hnuaia inhlawhfa (casual labour) zaa 44 leh regular-a hlawh la pangngai zaa 9 an awm a, sorkar leh private company changtlung tak zawm lo hna thawktu (informal labour) an tam ber a ni.
Heng bakah hian AAY leh PHH card hmanga buhfai la mi nuai khat chuang an awm bawk a, C-LAP hi sorkar hmalakna tur ruahman zelna atan leh zirlai research ti duhte tan data pawimawh tak a nih thu tar lan a ni.