Aizawl tuilakna a hlui tawh a, department lamin siamthat leh siamrem hna thawk reng mahse a that leh pangngai thu lam hriat tur a la awm lo a, vawiin thlengin tui lamah harsatna kan la tawk tluang zel.
Ruahtui tla tam mahse tui kan hnianghnar phah lo a, tui a nu a, a tinutu chu keimahni bawk kan ni. Leivung leh bawlhhlawh paih fimkhur loh avangin vawiin thlengin kan tuilakna lamah harsatna kan tawk a, tui kan hnianghnar loh phah bawk.
A thawktu lam chu an hahin, an theih ang anga mipuite tui min pek duh mahse semchhuah tur an dawn miau loh chuan an tan chet ngaihna a awm lo a, mipui bawkin kan tuar leh thin zawng a ni e.
Hetih lai hian a chinfel hna erawh kan duh chuan kan thawk thei a, veng thenkhatah tha taka tui a haw laiin thla khat chuang tui haw tawh lo an la awm zel thung a, a changtu minister lah chuan insawifiah bak tih theih a nei lo niin a lang bawk si. Tui sem tur dawng lo tam tak an la awm fo thin hi a va veiawm ta em.
Tui a lo nu a nih pawhin hmun hrana mi lak pen dante kawngte hi ngaihtuah mai se la, veng thenkhatah kartin emaw kar hnih dan emawa an sem theih lai hian veng thenkhatah erawh a thla chuang an dawng lo a, hengte hi siamrem dan zawn theih awm tak a nih lai hian ngaihtuahna an hmang chuang lem lo niin a lang a, mipui lamin insawifiahna bak kan hre ngai bawk si lo, chhungkaw tam tak lu a hai ta e.