Mizoram in state kan neihna pawh kum 40 a ni ta. Hemi chhung ringawt pawh hian sorkar tam tak an inthlak a, party hrang hrangin min kaihhruai tawh a, minister thahnem tak kan nei hman bawk.
Party pakhatin rei fe ro an rel chhung a awm a, tun sorkar kan hrawn mek hian rorelna fawng an chelh vawikhatna a ni chauh zawk a ni.
Hemi hun chhung hian hmasawnna hnathawh tam tak a kal hman a, thil tha tam tak kan nei a, hlawhtling zo ta lo thahnem tak a awm bawk.
Chutihrual erawh chuan kan kawngpuite hian ngaihsak an la hlawh lo tluang zel a, fur khat daih em pawh siam thiam lo sorkar an la ni reng hi a manganthlak tak zet tawh a ni.
Eng party pawhin inthlan dawn apianga intawktarhna an siamah kawngpui tha chungchang an telh fo a, hmasawnna erawh a awm mawh hle.
Kan kawngpuite hian ngaihsak an la hlawh lo tluang zel a, kawng a chhiat avangin nunna tam takin lakin a awm tawh a, lirthei tam tak a lo chhiat phah tawh bawk. A mawhphurtu chu sorkar hi a ni chiang a ni!
Tuna sorkar-na chelh mektute pawh hi an insawi ang em em chuan eng ruai an la ni chuang lo a, kan ram kawngpui hi en ila tlan hlauhawm tak tak a la tam hle. Fur khat daih pawh hi an siam thiam lo a, kawng dang kan neih miau loh avangin kan zawh lo thei bawk si lo. Kawng chhiatna bial chhunga mipuite hi mangkhawng hnuaia zin reng ang an ni mai a, sorkar hian a sawi ringawta enkawl mai lo hian a takin enkawl se la, duty siamin nitin kawngchhe vilven hna hi thawk teh se, chutiang ti thei tur chuan hnathawk an nei!