Sudan-a West Kordofan state rangkachak laih chhuahna khur chimah mi 70 vel an thi.
Al-Nuhud khaw bula al-Zaraa mine-a Thawhlehnia a bul hnaia mi mining shaft eng emaw zat chim avanga chhiatna thlengah hian thil lai chhuaktu eng emaw zat an thi a, tam tak an la tang bawk tih Kordofan Observatory monitoring group chuan Nilaini khan a sawi.
Kordofan Observatory hian chhanchhuah hna thawh chu a thiam bik rescue team-in hmanraw tha zawk nen an zawm tawh a, lei a nep a, a vut nasat bawk avangin dam chhuakte lak chhuah erawh a khirh hle tih a sawi.
Heng lai hmun thununtu, paramilitary Rapid Support Forces (RSF) chuan mi 82 vel an thi a, mi 50-in hliam an tuar niin AFP news agency a hrilh a. “A chhungah eng zat nge tang hriat a ni lo va, chhanchhuah tuma beih mek a ni,” tin chanchinbu hnena a hming sawi duh lo thuneitu chuan a sawi.
Dam chhuak zinga pakhat, Khair al-Sayyed Jabara-a chuan Thawhlehni zan zankhua khan an hmanraw neih ang angin an thiante chhanchhuah tuma an hai thu Nilaini khan AFP a hrilh a, hmanraw lian zawk an mamawh hle tih a sawi.
“Tang zat chiah hi kan hre thei rih lo,” a ti.
Dam chhuak dang, Amin Suleiman-a chuan shaft chim ta chu inhnaih taka awm awm niin pakhat chimin a dang a chimpui zui niin a sawi.
Tual chhung mite chuan Reuters news agency hnenah invenna hmanrua leh chhanchhuahna hmanrua a thah loh avangin thi zat hi an tam thei niin an sawi.
Khartoum-a damdawi thiam pawl, Sudan Doctors Network chuan thi zat hi an pung thei tih an sawi a, hna thawktute hian himna atana mamawh thil engmah an nei lo niin an sawi.
West Kordofan hi April, 2023 atanga Sudan-a sipaite nena indo, paramilitary RSF-in an thunun lai a ni a. Rangkachak laia an hralh hi an pawm sum hnar ber pakhat a ni.
Sudan hi Africa-a rangkachak lai chhuak tam ber an ni a, an laih dan hmang erawh a hlauhawm a, hman tawh loh hmun leh sorkarin laihna tur a tih ni lem lova laihte pawh a awm avangin thawktute tan a him lo hle a ni.