Aizawl: Mizoram atanga Bar Council of Assam, Nagaland, Mizoram, Arunachal Pradesh leh Sikkim Executive Member hmasa ber ni turin Linda L. Fambawl, Additional Advocate General chu ruat a ni.
He ruatna hi Supreme Court-in August 4, 2026-a Writ Petition hrang hrang atanga thutlukna a siam angin kalpui a ni a. State Bar Council-ah hmeichhe member pahnih nomination leh co-option chungchang sawiho turin Gauhati High Court Chief Justice, Ashutosh Kumar chuan State Bar Council-a elected member-te meeting a ko a, he meeting-a inrawnkhawm hnu hian Mizoram atanga Linda L. Fambawl hi ruat a lo ni ta a ni.
Bar Council Executive Member thar Linda L. Fambawl hian kum 2005 khan Delhi University hnuaia Campus Law Centre atangin LLB a zir chhuak a. Kum 2008-ah Aizawl-ah Assistant Public Prosecutor (Asst. PP) leh Assistant Government Advocate (Asst. GA) atan hna a thawk tan a, kum 2012 khan Gauhati High Court, Aizawl Bench-ah Government Advocate (GA) leh Additional Public Prosecutor (Addl. PP) atan kaisan tir a ni.
Kum 2024 atang khan Gauhati High Court-ah Additional Advocate General (Addl. AG) leh Public Prosecutor (PP) hna hi a chelh zui a ni.