Aizawl: Mizorama khualzin lo lut an pun chak zel avangin khualzinna hmunte naupangte tana hmun him a nih theih nan, Mizoram State Commission for Promotion of Child Rights (MSCPCR) buatsaihin Ningani khan Zo-hall, Tourist Lodge, Chaltlangah ‘Promoting Child-safe Tourism in Mizoram’ tih thupui hmangin inrawnkhawmna hun hmang a, he hun hi Tourism Minister Lalnghinglova Hmar-in khuallian niin a hmanpui.
Lalnghinglova Hmar chuan Mizoramah tourism a thang mek tih sawiin nikum khan khualzin 8,41,322 an lo lut a, kumin 2026-ah phei chuan July thla thleng chauh pawhin mi 6,12,463 an tling tawh tih a sawi.
State chhunga cheng zat aia tam mah khualzin lo lut thei an nih tak avangin, hei hian harsatna hrang hrang a thlen palh huna naupangte himna ngaihtuah chu tihmakmawh a nih thu a sawi a. Harsatna thleng thinte hmachhawn turin sorkar, kohhran, tlawmngai pawl leh khawtlang mipuiten chak taka hma an lak a tul thu a sawi bawk.
He consultation meeting hi hun thumah then niin, technical session-ah Tourism Deputy Director Rachel Lalrinhlui, MSCPCR member R. Laltanpuia leh MSCPCR Legal Officer Priscilla Lallawmsangi ten Mizoram tourism dinhmun, child labour dan leh naupangte dikna chanvo chungchangah an sawi a. Hun thumnaah kalkhawmte atanga rawtna leh ngaihdante sawiho a ni a, heng rawtna lutte hi MSCPCR chuan thlifimin sorkarah an thlen leh dawn a ni.
He hunah hian MSCPR leh sorkar department hrang hrang hotute bakah Mizoram Kohhran Hruaitute Committee (MKHC), Central YMA leh MHIP aiawhte an tel a ni.