Skywalk leh ropeway project hnuaia eiruk thubuai kal mekah tourism minister hlui pahnih, Robert Romawia Royte leh John Rotluangliana ten paih zalen (discharge application) an dilna chu Special Court (Prevention of Corruption Act) chuan a hnawl a, an pahnih hian thubuai ngaihtuah chhunzawm zel a ni dawn.
Nilaini khan Special Judge F. Rohlupuia, Prevention of Corruption Act Court, Aizawl chuan dilna hi ngaihtuahin a hnawl a ni.
Puh a nihna chungchangah Robert Romawia ukil chuan court-ah he thubuai kalpui zel tura puhna tling leh finfiahna tha a awm loh thu thlenin prosecution lamin innghahna atan a hman note-sheet leh payment record-te chu eirua puhna atan rintlak a nih loh thu a sawi.
John Rotluangliana ukil pawhin project fund pawisa a dawng ngei em tih leh a lo hlep ru em tih finfiahna mumal a awm loh thu a thlen bawk.
Court chuan charge-sheet, document thehluh tawhte leh eirua puh pahnihte atanga thu thlente a zirchian hnuin an lakah thubuai kalpui zelna tur thu tling leh chhan tha a awm niin a hria a, dan angin an thubuai hi ngaihtuah chhunzawm turin a ti ta a ni.
Thudawn danin tourism minister hlui, Hachhek bialtu MLA, Robert Romawia Royte chuan dan kalha chetna leh eirukna thilah inhnamhnawihna a neih lohzia a chian thu sawiin discharge a dilna hnawl a nih avangin high court-ah zualko a tum a ni.