Tuensang district, Nagaland-a zu tha lo nia hriat in vanga thi chu mi 11 an tling ta tih thuneituten an sawi.
Police chuan district hospital-a dah luh an nih hnuah September 10 leh 12 inkara thi an ni hlawm tih a sawi a. Chhuinaah chuan a hmain zu an in a, a hnuah an khaw hmuh a fiah lo va, an lu a na a, a hai a, an chauh a, an luak bawk tih an sawi.
Inrinni thleng khan Tuensang police chuan Central Forensic Science Laboratory (CFSL), Guwahati-a endik tura sample an thawn report an la dawng lo tih an sawi.
Thi mi 11-te hian batch khata mi zu inang vek an in nia sawi a ni.
Nagaland-ah hian Nagaland Liquor Total Prohibition (NLTP) Act 1989 hmangin April, 1990 atang khan zu kawl, hralh, in, siam, lak luh leh thawn chhuah khap a ni.
Chhinchhiah chiah lova zu him lo in a awm phah nia ngaih a ni a, health activist leh zu khap duh lotute chuan khapna avang hian a ruka zu lak luh a tam a, hei hi a inte tan a him lo niin an sawi a, khapna hlih an duh.
NLTP Act hi vantlangah pawh inhnialna a nasa a. Mi tam ber chuan tha an la ti a, a bikin Nagaland Baptist Church Council (NBCC) chu zu khap duh langsar niin state sorkar pawh zu khapna khauh taka kengkawh tura ngentute an ni.
Tuensang-a thil a thlen hma hian NBCC hian state sorkar hnenah hian dan lova zu zawh chu na zawka khap turin an ngen a, khauh zawka NLTP kengkawh turin an ti.
Tun tum thil thlengah pawh hian NBCC chuan sorkar chu chiang taka chhuia a mawhphurtute pawh man chhuaka dan ang taka hrem turin an ngen.
Zu khapna dan chungchangah hian mi tam tak chuan sorkar hian NBCC hi an hlau va, zu thlahdul hi tha ti reng chungin an kaltlangpui ngam lo niin an sawi thin a. Kohhran thu zawm loh hi ‘vote bank’ tam tak hloh theihna nia ngaiin an thu hi an zawm loh an hreh thin niin an ngai.