Aizawl: Congress MLA hlui, Nihar Kanti Chakma chuan Tlabunga chu ‘Chakmate khaw hlun’ tia a sawi chungchanga Mizo leh Chakma inkara thil thleng zawng zawng bul tanna chu amah a nih thu a pha lo tih sawiin ngaihdam a dil a. All India Chakma Students’ Union (AICSU) thuchhuah siam engmah a hriatpui loh thu a sawi.
Inrinni khan Aizawl Press Club-a thu thar thehdarhtute kawmin MPCC General Secretary Nihar Kanti Chakma chuan a phone-ah Artificial Intelligence (AI) hman tangkai dan a zirna lamah a thil ziah sual palhin thil pawi tak a sawi thu a sawi a. Hetah hian Tlabung chu ‘Chakmate khaw hlun’ tia a sawi leh kum 1898-a British rorelna hnuaia rin luh a nih hmaa Chittagong Hill Tract-a bet leh Chakmate luah chin ram nia a lo ziah chu thil pawi tak a nih thu a sawi.
Nihar Kanti Chakma chuan hetianga ziak sualin thil pawi tak a sawi tih a inhriat hnu hian Tlabung YMA ngenna angin thupha a lo chawi tawh a, boruak a dai tawh emaw tia a lawm hle laiin AICSU chuan hemi chungchang hi behchhanin thuchhuah an siam tih a sawi a. AICSU thuchhuah siam chungchangah hian engmah a hriatpui loh thu a sawi.
Tlabung Welfare, Aizawl chuan September 10, 2026 khan amah hi len chilhin press conference kova ngaihdam dil tura an ngenna angin Aizawl Press Club-ah hian thuthar thehdarhtute a kawm ta tih a sawi a. Heng thil thleng zawng zawng hi a bul tanna chu amah a ni tih a phat loh thu sawiin, pawi a tiin a inchhir tak meuh meuh a; chuvangin, thuthar lakhawmtute hmaa a thupha chawi chu pawmsak turin Tlabung YMA leh Tlabung Welfare, Aizawl bakah hemi chungchanga an rilru a tihnatsak zawng zawngte a ngen a ni.