Barcelona winger Raphinha chuan Catalan club tana a inpekna chu tlang takin a puang a, contract pawh seia Camp Nou-ah ngei a professional career tihtawp a duh thu a sawi.
Brazil forward hian tun season bul a tan tha hle a, goal a khung hnem bakah captain armband a hreng mek a, hei hian Barcelona-a a awm zui zel a rinawm zual hle.
Nipui chawlh chhunga a hmakhua chungchanga thu thang hrang hrang a awm hnuah Raphinha chuan Barcelona-ah rei tak awm chhunzawm zel a tum thu sawiin, chhuah thu thang chu a titawp a. Club hotute nen contract thar chungchang sawi dun an châk tawh hle tih a sawi bawk.
Manager Hansi Flick chuan tun season-a captain hmasa ber atana a ruat hnuah Raphinha hian mawhphurhna a hlen tha hle a. Khelmual chhunga a khel pawh a dik a, Spain-ah goal khung hnem ber niin goal kua a khung tawh a, tual chhungah season bul tan tha tak Barcelona tan a hlu tak zet a ni tih a lantir chiang hle.
Raphinha leh Barcelona te contract neih mek chu kum 2028 nipui thleng a ni a, Sporting Director Deco chuan an forward chu humhalh zel an tum thu a lo sawi tawh a. Raphinha pawhin inremna thar ziah hi a phur hle a, Spanish club liana a lo inbenbel tirha a ngaihtuahna pawh a sawi chhuak bawk.
RAC1 hnenah Raphinha chuan, “Kum 2028 thleng contract ka ziah thar khan ka hman zawh hunah chuan kum 30 emaw, 31 emaw ka ni tawh dawn a, eng ang takin nge ka inkhelh zui zel ang tih ka inhre lo a ni,” a ti.
Raphinha hian Flick-a hnuaia awm nuam a ti hle a, season eng emaw zat chhung chu tun anga tha hian a khel chhunzawm thei ang tih a inring a ni.