Nasa takin kan ramah ruihhlo a lo lut a, man theih tam tak kan neih laiin man hman loha kan ram kaltlang tam tak a awm bawk. A veiawm lai ber chu kan thalaite nasa taka min nghaisa a, nunna tawi phah ta an tam ta lutuk hi a ni.
Engtinnge ruihhlo laka kan him theih ang a, engtinnge a tih rem dan kan ngaihtuah ang tih hi ngun zawka kan ngaihtuah a ngai tawh a, chuti a nih loh chuan kan ram kal zel tur atan hian a pawi hle thei dawn a ni.
A that lohzia hi kan inhrilh mawlh mawlh a, nasa zawka kan inzirtir a, zirlaite zir tur pawha a that lohzia hi kan ziah hi a tul tawh hle.
Zirlaibuah te hian telh ni sela, a tul angin hmalak thuai thuai ni teh se. Chuti a nih loh chuan kan ram hi chenna tlak loh leh naupang zawkte thanlenna tlak lovah kan chhuah mai ang tih a hlauhawm a, kan zavaia kan inven tlan a ngai a ni.
Ruihhlo hi khawvelin a buaipui a ni a, kan ram pawhin kan buaipui a ni chho mek. Chhungkaw tam tak rumna thlentu, chhungkaw tam tak tikehchhetu a ni a, a huatawm mai bakah, a tihbaiawm tawh!
Kan ram hi ruihhlo kalkawng nia sawi a nih miau avangin kan fimkhur a, a hlauhawmzia hi nasa zawka kan inzirtir mawlh mawlh a, sorkar leh kohhran hian a do rawn a ngai a, chhungkaw tin kan tanrual a ngai bawk.
Kan ram kal zel tur hi thlir ila, naupang ni mekte khawvel hi a rawn nih chhoh ve hunah chuan khua kan tlai tawh ang tih a hlauhawm avangin tun atangin ruihhlo do turin ke i pen tan ang u.