Mizoram 9 Ball Pool Championship 2026 – Women & Junior (Under 21)-ah Lunglei player ve ve an champion a. Hmeichhiaah Zonunsangi leh mipa Junior-ah Joseph R Lallawmawma an champion.
Mizoram Snooker & Billiards Association (MSBA) buatsaih inelna final hi Zirtawpni khan khelh a ni a, race to 4-a hmeichhe final khelhah Zonunsangi hian a Melody Vanlalpeki chu 4-2-a hnehin a champion.
Mipa final-ah hian Joseph-a hian Alfred Lalnunfela chu 4-1-in hnehna a chang bawk.
Hmeichhe pual bika championship leh mipa under 21 hi a vawi khatna a ni a, hmeichhiaah mi 12 leh mipa 21 an tel.
A kharna inkhawmah MSBA President Lalbiaksanga chuan women & junior (U-21) championship an buatsaih vawi khatnaa hetiang zat an tel thei chu lawmawm a tih thu a sawi a, “National level-ah women leh junior player tirh chhuah ve theih hun kan lo thlir thin chu a tak a thleng tawh dawn niin a lang,” tiin theihtawp chhuah zel turin a fuih.