Indian police-te chuan voter list ennawn sawi hlawh taka thil dik tawk lova kalpui a awm nia sawi avanga chief election commissioner (CEC) bân phuta New Delhi-a kawng zawh eptu party hruaitu eng emaw zat an man.
Tun tuma eptuten kawng an zawh hi Prime Minister Narendra Modi-a’n a term thumna a hman lai meka atana chona lian tak a tling thar leh mek a, thla tam liam lovah khan thalai rualten exam zawhna put ru avanga lo bei chiam tawhin a education minister a bân phah hial tawh.
Modi-a sorkar eptute bakah hian thalai rual, Cockroach Janta Party (CJP) chuan CEC Gyanesh Kumar-a hi Indian Express chanchinbuin thla hmasaa Election Commission of India (ECI) chhunga inrem lohna a awm tih an tar lan hnuah bâng turin an nawr.
ECI-a member pathum awmte chu inlungrual leh tan lam nei lo tur an nih laiin Voter list ennawn leh inziah luh dan kalphungah an thu a inhmu lo va, Modi-a sorkar ruat an nih bawk si avangin an zinga thuneitu ber, CEC chuan ama thu anga sorkar lai tana tha tura thil kalpui anga puh a ni zui ta a ni.
Congress President Mallikarjun Kharge-a chuan Thawhlehnia ECI pisapui pana kawng an zawh tan hma hian thuthar lakhawmtute hnenah, “ECI hi sorkar kaihbu mai mai a ni,” a ti a. “Kan mipui rorelna neih chhan nan kan bei dawn a ni,” a ti.
Congress MP tam tak chuan placard an keng a, hnam puanzar an vai a, Kumar-a an duh lohna leh bâng tura an duhna chu km khat vela thui, parliament atanga an pisa inkar an kal chhungin an aupui bawk.
Placard thenkhatah chuan Kumar-a chu phatsantu leh BJP chu mipuiin vote theihna chanvo an neih chhuhsaktuah an puh a, pisa an thlen hian a tualah thukhawmin hmuh an phut bawk.
Eptu hruaitu, Rahul Gandhi, a farnu Priyanka leh mi dang tam tak chu police-in an lo danna thir (barricade) chungah dingin hnam puanzar an vai a, Kumar-a chu bâng tura an tihna an aupui hlawm.
Venhim hna thawktu tam tak, thenkhat phei chu riot gear-a inthuam leh tiang kengte chuan Gandhi-a leh MP dangten ECI pisa chhung luh an tum chu an dang a. Police chuan mi man chungchangah engmah sawi an la nei lo.
Eptuten kawng an zawh tan hma lawk hian rorel lai, BJP thupuangtu, Sambit Patra chuan, “Vawi tam tak an hlawhchham hnuah Congress hruaitute hian ram chhunga buaina siamin kan institution-te bei turin thutlukna an siam ta a ni,” tiin thuthar lakhawmtute hnenah a sawi.
TV channel-te chuan Gandhi unau pawh police-in an man zingah an tel a, a hnu lawkah chhuah leh an ni tih an puang hlawh.
Dan an nih avangin kawnga thing hlimah mipui hi an thu a, an unau hian pisa dawt chiahah radio pisa kaltlanga luh an tum niin channel-te chuan an tar lang.
Congress bakah political party dangte pawhin voter list ennawn, nikum atanga special intensive revision kalpui chu Modi-a leh a party tana hlawkpui tura tih niin an sawi hlawm a. Kumar-a chuan tuna buaina chungchangah hian engmah sawi a la nei lo va; mahse, commission leh Modi-a BJP chuan an puhna hi a dik lo tih an lo sawi tawh thung.
Thawhlehnia eptuten Kuman-a a bân phuta kawng an zawh hi tun hnaia CEC laka lungawi lohna lantir mawlh mawlh zinga pakhat a ni a. Kar hmasa khan zirlai pawl, political party leh CJP-te pawhin an lo lantir tawh a ni.
Supreme Court chuan Thawhtanni khan ECI-in voter list a ennawn leh thun belh te, tihdik tawk loh awm nia sawi chungchang leh Kumar-a inrawlh dan sawi chungchangah te inrawlh tura ngenna chu a ngaihtuah tan.
ECI-in tan lam a nei nia an puhna thehluttute chu ‘dan kala thutlukna siam a awm a nih chuan kan en zel ang’ tiin court chuan a ngaihtuahnaah a sawi a ni.