Democratic Republic of Congo luia lawngleng insu avangin mi 30 vel an thi a, mi thahnem tak chin hriat an ni lo bawk.
Congo luiah lawng pahnih insuin lawng dang pakhat an hnawl tel niin thuneitute chuan Thawhtanni khan an sawi a. Tawhsual hi Pathianni tlaia an ram hmarthlang, Equateur province-a Ngombe-Lukolela bula thleng a ni.
Thuneitute chuan mi 30 vel tuiah an tla hlum tih an sawi a, chin hriat lohte zawn leh chhanchhuah hna an thawk mek zel.
Equateur province Interior Minister Crispin Mputu-a chuan sorkar news agency Agence Congolaise Presse hnenah an khawpui, Kinshasha atanga thir lawng, ‘Dieu se cache’ kal chuan thinga siam lawng, Businga atanga kal, ‘HB Super Victoire’ a su niin a sawi.
“A chuangte zawng zawng deuhthaw tuiah an pil a, lawng pawh a pil a. Tuia tlate hi tui mawngah an tla zel a ni,” a ti.
Chhiatna thlen chhan hi hriat chiah a ni lo va, Mputu-a chuan zana lawng veivakten chhiat hi an tawk duh zual niin a sawi.
Thil thleng hmutu venhim hna thawktu officer chuan Kinshasa atanga kal lawng hi a chuang thei zat aia tam mihring a phur niin The Associated Press news agency a hrilh.
DRC-ah hian lawngleng chhiatna hi a tam hle a, zana an kal bakah mi an phur tam thei lutuk chu a chhanah an puh ber thin.
Himna dan zam a chhia a, ram kilkhawrah phei chuan lawng an enkiawl tha lo bawk a, mi tam tak thihna a thlen phah thin nia sawi a ni a. July maiah pawh khan Kasai province-a zirlai phur thing lawng chesualah mi 20 vel an lo thi tawh a ni.