Vanlalhriata’n a tir lam leh a tawp lamah vawi hnih champion tawh, C Lalhruaitluanga a hnek hneh a, Thawhtanni zanah lehthalin Mizoram Labour Link LPS Pro Fight middleweight semifinal a lut.
LPS Arena, Falkland-ah College Veng tlangvalin hun chhinchhiahtlak a hmang a, round li an inhnek hnuah unanimous decision-in amah aia rin hlawh leh sulhnu nei tha, Hruaia a hneh a, judge pathumin 39-38, 39-38, 39-37-a an chaktir rualin Orient Goldsmith Fighter of the Night lawmman a dawng.
Pro Fight-a hriat la hlawh ngai lo, kum 23 mi hian a tirah a taksaah na takin vawi hnih a hneksak a, round hmasa berah chungnungin a vei leh ding a chhuah zawn hmangin a tibuai a, a vei lama a vai fuh hnuah hnek zawnin a ding lamin vawi hnih lang thamin a fuh bawk.
Round hnihnaah kum 29 mi, Hruaia’n tan hmun a siam rem a, a vei lama a vai hnuah a ding lamin a dawm zui a, tha takin he hnek dan hi a hman bakah a ngila a hnek zawnin awmzia a nei tel a. Round thumnaah Hriata’n a vei lama a hnek zawn leh a taksaa a hneksak bakah inhnek tawnah kut rang leh chhuah hnem zawk a ni tel a, Hruaia’n vai fuh zawnin a pantu a ni hnem ve thung a, an inhnek tawk hle.
Round hnuhnung berah Hriata’n hnek zawnin vawi thum a fuh nghal a, a hnuah a ngilin a hnek fuh zawn bawk a, Hruaia’n dawmin nawr let tum viau mah se tlo leh mar takin College Veng boxer a ding tluan a, chiang takin round lina a la a ni.
Pro Fight-a a tel tawhah Chawngtlai boxer Hruaia tlak hma ber a thleng a, a tel hmasa ber, kum 2022 khan welter-ah champion nghalin kum 2023-ah middle-ah a insawn a, a champion zui leh nghal.
Championship hnuhnung ber, kum 2024 khan champion kawnghren humhim zo lovin title fight-ah F Lalthanliana Jr a hneh lo a, kuminah lak kir leh tum mah se a vanglai angin a tuan a tha tawk tawh lo va. Inhnaih chilhah vawi thum aia tam hnek chhuah zawn a harsat a, a taksaah lehlamin a hneksak hnem hle bawk a ni.
Middleweight champion lai. Thanliana title chhuhsak tum zinga seed sang ber, Hruaia a hneh rualin Hriata’n beiseina sang tak a nei zui a, Zirtawpni zan semifinal-ah a inlan dawn a, Lalhriattira, Tuithiang leh PC Remruatdika, Lunglei Ramthar chak zawk a hmachhawn ang.
Bantam quarterfinal-ah seed sang ber, L Joseph Buihringpachha chuan round li la vekin Mualcheng South tlangval Dolrich Zothansanga a hneh a, vawi hnih a inhnek tawhah chiang takin a chak ve ve a, Zirtawpni zan semifinal-ah a inlan leh ang.
Kum 17 mi, College Vaih Siaha boxer hi Pro Fight-a a tel vawi khatna ni mah se Khelo India Centre of Excellence atanga inzir chhuak a ni a, boxing thiamna tha tak lantirin kawng hrang hrangin inhnek a thunun a. Amah aia kum thuma upa, Zothana’n hnek let hneh lo mah se a tawp thlengin chiai lovin a bei let tluan a ni.