Aizawl: Guwahati High Court Additional Judge, Justice Helen Dawngliani chuan India-ah Mizoram chu hmeichhiate dinhmun that berna pawl state a nih rualin, hmasawnna tur tam tak a la awm thu a sawi.
Mizoram State Legal Services Authority (MSLSA) leh All Mizoram Women Federation (AMWF) tangkawpin an buatsaih, ‘Hmeichhiate chungchanga Dan leh Hraite Zirhona’ (Sensitisation on Women-centric Laws) chu Thawhlehni khan I&PR Conference Hall, Lianchhiari Runah neih a ni a; he hun hi Guwahati High Court Additional Judge, Justice Helen Dawngliani chuan khuallian niin a hawng.
Justice Helen Dawngliani chuan India ramah Mizoram chu hmeichhiate dinhmun that berna pawl state a nih rualin hmasawnna tur tam tak a la awm thu a sawi.
Hmeichhiate tana dan leh hrai chu mi tin hriat atana pawimawh leh ni tin nunphunga hman nghal theih a nih bakah, hmeichhiate pawhin heng dan hmang hian mahni zawn theuhva mawhphurhna an neihte pawh hriat tel a tul tih a sawi.
Hmeichhiate chu eng dinhmunah pawh ding se khawtlang innghahna lungphum pawimawh ber an nih avangin, inchhung khura an mawhphurhna dah pawimawh thiam fo tur leh danglamna thlen tu an ni tih inhre reng turin kalkhawmte a fuih bawk.
Zirhona hun hi AMWF President Dr. Jane R. Ralte-in a kaihruai a, Advocate Lalfamkimi’n ‘Mizo Marriage & Inheritance of Property Amendment Act’ chungchang zirtirna a pe a, Senior Advocate Dina Ri T. Azyu-i’n hmeichhiate tana dan leh hrai hnuaia dikna chanvo leh hamthatna awm te a sawifiah.
Cyber Crime P/S 2nd OC M.S. Dawngliana’n ‘Cyber crime laka Hmeichhiate Himna’ tih thupui hmangin zirtirna a pe bawk.