Aizawl: Mizorama khuh damdawi hman sualna leh a ruka hralh hluar ta lutuk tihreh dan tur chungchang sawihona, ‘Inter-Ministerial Meeting’ chu Health Minister Lalrinpuii leh Excise & Narcotics Minister Lalnghinglova Hmar te kaihhruaiin neih a ni. Health Department, Excise & Narcotics Department leh Central YMA hotute an tel.
Thawhlehnia SAD Conference Hall, MINECO-a thutkhawmah hian heroin a van tak deuh avanga damdawi ruih theih (pharmaceutical drugs) lamah mi tam tak an tlan thu sawi a ni a. A bikin Codeine Syrup chu doctor chawh lohva a ruka hralh leh hman sual a nasat bakah, Mizoram hmun kilkhawr ber thlengin a hluar tih sawi a ni.
Damdawi bur a taka Codeine Syrup ni reng si label dang daih bela hralh tum te, phailam mite nen inthuruala damdawi zuar leh Medical Representative thenkhat hetiang zawrhnaa inhnamhnawih te man an nih tawh thu leh investigative hna ngawrh taka kalpui mek a nih thu sawi a ni bawk.
Health minister chuan ruihhlo dona kawnga Excise & Narcotics leh Central YMA-te thawhrimna fakin, dan tha taka zawm tum lote licence chu sorkarin tihtawp zel a hreh dawn lo tih sawiin, licence thar pek zel kawngah pawh sorkar fimkhur takin a kal a ni tih a sawi bawk.
Thutkhawmah hian sorkar department leh Central YMA thawhhona hmangin damdawi hmansualna tihreh beisei a ni a, hun remchang hmasa berah Mizoram Chemists & Druggists Association, Mizoram Medical Representative Association leh Mobile Drugs Dealers Association te nen meeting neih leh nise tiin an rel a ni.