Thenawm ram leh state hrang hrang an buai a, kan unaute tam tak sahimna zawngin kan ramah an rawn lut a, keinin theihtawpa kan lo tuamhlawm lai hian hmun thenkhatah dan phal loh thil tite avangin hmingchhiatna a lo thleng leh thin, hei hi a pawi hle.
Unau hmelhai hun a thleng mai ang tih hi a hlauhawm thin a, chumi a thlen loh nan chuan thildik titu ni chungin, dan phal thil chauh tih i ching tlang ang u.
Kan unau sahimna zawnga rawn lutte pawh fimkhur lehzual se la, a ram neitute harsatna leh buaina siam zawnga khawsa lovin, danin a phal chin chauh hmangin nun tum se la a duhawm hle.
Zofate hi hmun hrang hrangah kan duh vang ni lovin thendarhin kan awm a, kan awmna hmun lo hrang mah se unau kan nihna erawh a bo chuang si lo. Hei vang hian kan inunauna tichhe thei zawnga khawsa an awm leh thin hi a pawi a, chutiang a thlen loh nan chuan mitin kan fimkhur a, kan nun kan uluk a va tul em.
Unau hmelhai hi a thleng thei reng tih hria ila, chumi erawh thleng lo se a tha hle thung. Mitin fimkhur ila, kan ram neihchhun humhima a awm a, a chengte leh min rawn fintute lungrual taka kan awm zel theih nan ruihhlo leh a kaihhnawiha sualna thleng thin laka fihlim i tum zel ang u.