Bollywood film hlawhtling berte zinga mi MS Dhoni: The Untold Story an chan atangin kum 10 a lo tling ta a, a changtute zinga mi Disha Patani chuan a film set te chu thlirkirin, khami tum atang khan amahah hmasawnna tam tak a awm chho niin a sawi.
He film an siam lai hian tawnhriat la nei lo, la zakzum tak a nih thu Patani chuan sawiin, camera hmachhawn dan, set te hnathawh dan leh direction lak dan zawng zawngte chu a zir thar vek a nih thu a sawi a, kha film zet kha chuan tun hun thleng hian min pui a ni, ka kalkawng min hruaitu a ni, a ti.
Thil hresa ka ni lo a, ka zakzum a, mahse thawhpui nuam tak takte avangin tun hun hi ka thleng thei a, MS Dhoni: The Untold Story kha chu ka hrereng tawh ang, engkim ka inzirna bul chu a ni, a ti bawk.
Tunah chuan eng role pawh chang thei turin ka intuaihriam chho tawh a, role ngai put put hi ka ning thuai thin. Action a ni emaw, romantic a ni emaw insiamrem zung zung ka duh a, chumi tur hian ka tha tawkin ka inhre ve tawh bawk, a ti.
MS Dhoni: The Untold Story-ah hian boralta Sushant Singh Rajput, Anupam Kher, Kiara Advani leh mi lar tak takte nen an changho a, hun chhinchhiahtlak leh hlu tak a tawn tanna niin Patani chuan a sawi.