Saudi tumhmun beihnaah mi pathum an thi niin an ram civil aviation thuneituten an sawi a. Hetih lai hian Yemen-ah Iran-in a puih Houthi leh Saudi thlawp sorkar sipaite an inbei zui zel.
An khawpui, Riyadh-a King Khalid International Airport-ah mi pakhat thiin mi dang pariatin hliam an tua r a. Abha tumhmun beihnaah mi pahnih thiin 28-in hliam an tuar bawk tih Nilaini khan an sawi.
Pakhat hi Nilainia beih niin pakhat hi a hma nia mi a ni tih civil aviation thuneitute chuan an sawi bawk.
Houthi nena inbei mek Saudi kaihhruai tangrual chuan phuba lak an tum thu sawiin ‘hrem lohvin kan chhuah dawn lo’ an ti a. Nilaini zan tlai tawh taka tangrual thuchhuah chuan Saada, Hodeidah, Jawf lehMarib govenorate-a Houthi sipai hmun 80 an bei tih an tar lang bawk.
Saudi tumhmun beih hi thlawhnaa inkalpawhna beihna thar thleng mek a ni a. Nilaini vek khan Houthi hian Aden-a international airport chu ballistic missile leh drone hmangin an lo bei tawh bawk.
Yemen-a indonaah hian tun hnaiah tuikawng pawimawh tak, Bab el-Mandeb Strait leh a chhehvela inbeihna a nasa zual.
Kar tir lamah khan Yemeni sorkar sipaite chuan Saudi kaihhruai tangrualin thlawhna hmanga an puihna nen strait leh a bul vel an bei nasa a, September thlaa Houthi-in an lak, Mocha khua pawh an la let a; mahse, a bak hmalam an pan hlei thei lo.
US-Iran indona atanga kang kai, Yemen-a buaina hi kum 12 chhung indona awm tawh a tinung thar a, Arab ram zinga rethei ber ramah hian mi 2,00,000 vel tlanchhia an awm leh tawh niin International Organization for Migration (IOM) chuan a sawi.
Houthi-te hian US thawhpui, Saudi Arabia-a sorkar leh vantlang thil pawimawh – tumhmun, tuialhthei thlitfimna leh pipeline an bei nasa hle.
Tun hnaia an inchuh ber strait chu khawvel puma tuialhthei leh bungraw dang thawn tibuai thei a ni a, Saudi Arabia chuan Houthi-te an hnawh kian theih nan ram dang puihna pawh a dil a. Turkey chuan invenna leh technical thila puihna a pe a, NATO member leh Pakistan nen venhimna tura thawhho an tiam bawk.
Syria pawhin an thawhpui, Saudi Arabia hi sipai thilah a pui niin US thuneitu leh Syrian sipai hotuin an sawi.
Bab el-Mandeb thutchilhtu, Dhubab district khawthlang lamah inbeihna hi a nasa zual a, sorkar sipaite chuan vaukam zawl khawchhak lam tlang pawimawh lak tumin an bei nasa hle.
Houthi hian kum 2014-a an khawpui, Sanaa an lak hnuah Yemen hmar lam an thunun zui a, Saudi Arabia kaihhruaia tangrualte chuan Yemen-ah Iran-in boruak lian a neih an hlauh avangin an bei let a, indona rei tak awmin tun thlengin a la tawp thei lo a ni.