Aizawl : Right to Information (RTI) chu langtlang, mawhphurhna la ngam leh mipui tel vena sorkar din nana hmanrua pawimawh tak a nih thu larsap General (Dr) Vijay Kumar Singh chuan a sawi.
Ningania Mizoram Information Commission (MIC) buatsaih RTI Week 2026 lawmna Assembly Annexe Conference Hall, Aizawla neihah khuallian niin larsap chuan thu sawiin, RTI Act, 2005 chuan khua leh tuite hriat duh zawhfiah theihna a siamsak bakah Village Council leh Local Council thlenga RTI huamtir a ni chu mawhphurhna la ngam sorkar leh tualchhung rorelna siam kawnga rahbi pawimawh tak a nih thu a sawi.
Larsap chuan June 29, 2006-a din MIC-in RTI Act kenkawh kawnga hma a lak dante fakawm a tih thu sawiin, October 5, 2026-a tlangzarh tak RTI Online Version 2.0 chu tangkai taka hman a nih ngei a beisei thu a sawi a. RTI Act Section 4 hnuaia mipui hriat tur tlangzarhte chak taka bawhzui a tul thu leh, zawhna dawng kher lo pawha mipui tana hriat tulte tar chhuah a, thup nei lova langtlang taka hmalak chu rorelnaah kalphung ngheta neih zawk tur a ni, a ti bawk.
RTI Act hlawhtlinna tura RTI hmang thinte thahnemngaihna fakawm a tih thu sawiin larsap chuan, “RTI chu midang do leh ep rana chetna hmanrua ang zawnga thlir tur a ni lo va, rorelna khawl leh mipuite thlunzawmtu leh inrintawnna chawilar nana hman zawk tur a ni,” a ti.
RTI Week hman chhung hian RTI Act chungchang zirtirna leh zawh hmasak kher ngai lova mipui hriat tur chin langtlang taka pholante uar lehzuala kalpui nise a duh thu a sawi bawk.
He hunah hian college zirlaite puala RTI slogan inziahsiak buatsaiha tithate hnenah lawmman sem chhuah a ni.