Mizoram sorkarin Empowering Mizoram Sports a kalpui mek hnuaia Rs nuai 1,328.11 senga Lengpuia Archery Academy sakna tur Memorandum of Agreement (MoA) chu Ningani khan Sports Minister pisa-ah Mizoram State Sports Council (MSSC) leh National Thermal Power Corporation (NTPC) te’n an ziak.
He project hi Mizoram sorkar sum seng lo vin, NTPC Corporate Social Responsibility (CSR) fund hmanga bawhzui tur a ni a, hmarchhak bial chhunga sports CSR fund pek chhuah tawha a sang ber a ni.
MoA ziah zawhah Sports Minister Lalnghinglova Hmar chuan, he thawhhona hi Olympic Games 2036-a infiammi a tam thei ang ber tirh chhuah an tumna kawnga thil pawimawh tak a nih thu a sawi.
Minister chuan, “Hmathlir tihlawhtling turin talent leh infrastructure tha an ngai a, vawiina MoA kan ziah hian nasa takin min pui dawn a ni,” tiin, Mizoramin Olympian pahnih a neih tawh zinga pakhat chu Archer a nih thu leh NTPC puihnain Olympian dang an chhuah leh ngei a beisei thu a sawi a. Archery Association of Mizoram (AAM) chu a neitu rilru pu a, MSSC leh NTPC te nena thawhho tum tlat turin a chah bawk.
NTPC Bongaigaon AGM & Head of HR Amit Kumar Asthana pawhin Mizoram sorkarin sports-a hmathlir mumal tak a nei leh awmze nei taka hma a lak avanga phur taka he thawhhona hi zawm an nih thu leh, he MoA pawh hi Mizoram ngeia ziah an duh avanga lo kal an nih thu a sawi.
MSSC Secretary Henry C. Lalrawnkima report tar lan danin, he Archery Academy hi square metre 28,864-a zau ramah sak a ni dawn a, kum thum chhunga zawh tum a ni. Project chhungah hian metre 70-a thui shooting lane, archery range, academic building, hostel, gallery, pavilion, gym leh a vela a hungna leh lighting te kim taka rel a ni.