Kum sarih a cham tawh hnuah Juventus forward Paulo Dybala chuan club a chhuahsan dawn a ang ta hle a. Amah ngaihventu club tam tak an awm karah contract thar ziak tura club leh player inbiakna a hlawhtling lo.
Dybala leh Juventus hi thla engemaw zat inbiakna nei tawh an ni a, mahse contract an ziah theih tak loh avangin tun nipuiah Tuin chhuahsan tura ngaih a ni tawh.
Allianz Stadium-ah hian cham chhunzawm turin contract thar a hnai hman hle a, mahse an ziah belh tak lovah chuan June-ah a hmang zo dawn a, a club duh a zawm thei ang.
Engatinge?
Kum 2020 tawp lam a\angin inbiakna nei tawh mahse tunhnaiah inhliam avang leh beisei anga khelh loh a neih leh \hin avangin Dybala hi a tiahniam ni a ngaihna a awm a. Hei vang hian Bianconeri in tunhnaiah an inbiakna a Dybala contract an zawrh chu an thlak danglam a, hei hi player lamin an lawm lo hle.
Kum 2015 a Palermo a\anga Turin a pan hnu in Dybala hian trophy 12 a la tling tawh a, heng zingah hian Serie A title panga a tel.
Dybala ngaihventu club zingah hian Premier League club Tottenham an ri ring a, striker Harry Kane-a hma hun a chian loh avangin forward thar an ngaihven dawn niin sawi a awm.
Anni bakah English club pathum Liverpool, Manchester United leh Arsenal te sawi rik an ni bawk.
Club an insawifiah
Juventus in Dybala contract chungchanga thu thar a awm tak avangin an club CEO Maurizio Arrivabene chuan inbiakna an neih chungchang a sawi chhuak a. Serbian striker Dusan Vlahovic an lakluh chuan thil a thlak danglam tih a sawi.
Arrivabene chuan Dybala te nena an inbiakna hi sawi chhuakin, “|ha takin inbiakna kan nei a, engkim lungawi taka sawiin kan sawi fel thei.”
“Vlahovic kan lakluh hnuah hian Paulo hi he club a kan laimu ber a ni thei ta lova, chuvangin thutlukna kan siam ta a ni.”
“Dusan kan lakluhna hian engkim a thlak danglam a, Juventus in team kan duan dan leh kan thiltih dan her danglam a ngaih phah a, hengte hian Dybala contract chungchang pawh hi a nghawng lo thei lova. Inremna kan nei ta lo.”
“Juventus tan hian contract hniam zawk pek kha thil tih chi a ni bik lo. Paulo hi kan hnenah kum sarih a awm tawh a, khatiang contract inzawrh kha thil zahawm lo pawh a ni ang. Tuman a thiamna hi kan ringhlel lo. Mahse October thla a kan dinna leh tuna kan dinhmun a inang lova, contract rei zawng leh sum dinhmunte kan thlir a ngai a, hei hi club tana \ha zawk ni tura kan ngaih vang a ni.” a ti.