Inbumna thleng thei laka fimkhur reng a ngai
Khawvel hmasawnna leh thiamna a sang zel a, a tha zawngin nghawng tam tak nei mah se, a tha lo zawng leh dik lo zawnga hmang duh tan pawh hmanna tur a awm nual reng bawk. Hetiang kawng zawngtute chuan bum tur an zawng reng a, thiamna sang chho zel hi fimkhur nan kan hman reng a tul bawk tih kan hriat thar a tha.
CID (Crime) branch-in an chhinchhiah danin kum 2021-ah Mizoramah Cyber crime thubuai 470 vel ziahluh a nih thu leh heng zinga za-a 70 vel chu pawisa lam kaihhnawih a nih thu tun hnai khan Home Minister in a sawichhuak a, kum khat chhunga hetiang dinhmun kan kai hi a tlem lo. Fimkhur kan ngai viau.
Hri leng vangin nunphung a buai a, hnathawh leh pawn chhuah loh thlengin hun harsa leh khirh kan tawng a, chumi hun remchang chu lain pawisa hmanga inbumna pawh hi a tam phah hle niin a lang. Lo ni lo pawh nise, thiamna sang zel hmanga inbumna hi a awm reng tawh dawn. An awihawm poh leh rin loh ngam a hun viau tawh tih kan hriat thar reng hi a va tha em.
A chhuitu tur din nimahse, duh angin hma a la lak chak theih tak tak loh a, a thawktu lam indaih loh a la nasa hle niin a lang bawk. Chuvang chuan mipuite hian online hmanga inbumna thleng thei hrang hrang laka kan fimkhur a, midang zirtirtu kan nih fo reng pawh hi a tul awm e. Mitin i fimkhur tlang zel ang u.