Sudan-a paramilitary force-ten Ethiopia nena an inrina, Blue Nile region-ah drone hmangin mi 41 an that niin mihring dikna chanvo humhalhtu pawlten an sawi.
Rapid Support Forces (RSF) hian Abu Shandi-a tlanchhia awm khawmna hmun chu Zirtawpni khan an bei niin Emergency Lawyers chuan a sawi.
UN Office for Co-ordination of Humanitarian Affairs (Ocha) chuan ‘chanchin lungchhiatthlak leh rawng tak’ tiin a sawi a. Thi zinga a tam ber hi hmeichhia leh naupang an ni bawk niin a sawi.
Sudanese army leh paramilitary forces, RSF hi kum 2023 atang khan thuneihna inchuhin an intibuai tan a, an buaina avang hian mi sang tel thi awm tawhin chenna in chhuahsana an himna tura tlanchhia mi maktaduai 14 chuang an awm bawk.
Khawvela mihring dinhmun hniamna ber pakhat a ni mek a, mi maktaduai tel chu damdawia puih ngai ngawih ngawihin an awm a ni.
Sipaite hian Sudan laili leh khawchhak lam an thunun a, RSF hi khawthlang lam, Darfur-ah inkulhin an ram chhim lam hmun zau tak an thunun ve thung.
Lehlam lehlam hian drone hmanga mi beihah an inpuh tawn fo thin.
Ocha chuan heng lai hmun hi Zirtawpni khan beih niin tun hnaiah ‘chawl lova beih mawlh mawlh’ niin a sawi a, ‘baihvai taka awm civil mi sang telte chu an dinhmun harsa lehzualin a siam a ni’ an ti.