East Bengal-in Indian Super League (ISL) season tharah kum 22 chhung an lo tawn tawh loh phurna leh inchhuanna thinlung nen bul an tan dawn a, ram chhunga football inelna sang ber champion an nih avangin an nomawi kawl mek humhim an tum dawn a. Hetiang tura player rinrawl tur an ruahman zingah Mizo pali an tel.
East Bengal squad-a Mizote hi defender Lalchungnunga, midfielder Vanlalpeka Guite bakah forward Edmund Lalrindika leh David Lalhlansanga te an ni a. Midfielder Ramsanga chu season tawp thleng atan loan-in Gokulam Kerala ah an kaltir a ni.
Antonio Habas-a kaihhruai team hi ISL season hman zawh takah khan tum khat chiah tlawmin a vawi khat nan nomawi an la a, an hmelma lian, Mohun Bagan Super Giant chu goal difference-in an khum a ni.
Nomawi humhim tur an neih takah chuan pre-season chhungin mual chhung leh pawnah an buai hle a. Season liam taa Inter Kashi nena an inkhelh hnuhnung ber atang khan Durand Cup, Calcutta Football League (CFL), IFA Shield leh continental stage-ah te vawi eng emaw zat an inkhel tawh.
CFL-ah hian naupang zawkte tir chhuak mah se senior player tam zawkte pawhin vawi tam tak an khel a. Club hi bazar hun lai pawhin an buai hle a, season liam taa an player pawimawh berte zinga mi – midfielder Miguel Figueira, centre-back Kevin Sibille leh forward Youssef Ezzejjari te chuan team an chhuahsan a. Mahse, hma la vatin player thar tha tak tak an lak belh a, tual chhung player tha tak takte pawh an nei bawk.
Sibille hmun ruak chu Croatian defender Diego Zivulic-a’n a luah hmel a, league-a defender tha ber pawla chhal ngam, Anwar Ali nen tlar hnungah an ding dun dawn a. Counter-attacking team ni tura inpuahchah an nih avangin Habas-a chuan a sir lama khelte chu tlan hnem turin a beisei a, heng hmunte pawh hi thuam belh an ni.
Sandip Mandi leh Hardik Bhatt te chu Inter Kashi leh Sreenidi Deccan atangin lak thar an ni a, Jay Gupta pawh an nei sa bawk a. Heng player pathumte hi defence-a rin tlak an nih bakah hun remchang a awm chuan hma lama nawr chhuak thei vek an ni.
Season liam taa an player tha ber, Ferreira leh goal khung hnem ber, Ezzejjari te an chhuah avangin East Bengal tan chuan a buaithlak ve thei a. Mahse, team chuan league-a player dang tha takte la lutin, hnung lam hunte a liam tawh tih a lang chiang.
Season liam taa Punjab FC tana vawi 17 khelha goal nga khunga mi dang tana vawi thum siamsak thei, attacking midfielder Dani Ramirez an nei a, Red & Gold tan vawi riat a khelhah goal hnih khungin mi dang tan goal thum a siamsak tawh.
Hma lam chawmtu ber tura beisei a nih laiin Mohammed Rashid, Jeakson Singh leh player thar, Rohit Kumar te chuan mual laiah tlarhnung venpuitu tha an ni thung ang.
Tlar hmaah Ezzejjari-a hmun ruak hnawh khat turin ram pawn player pali lak thar an ni a. An zinga pakhat, Effiong Nsungusi chuan Punjab FC-ah season liam taah khan vawi 12 khelhah goal sarih a thun a. Ivorian Ake Loba, Pole Lukasz Zwolinski leh Aussie Chris Ikonomidis te nen tlar hma lamah duh thlan tur tam tak an awm dawn a ni.
Player tharte hian khelhna hmun chan hnem chungchangah Mizo forward Edmund Lalrindika leh David Lalhlansanga te nek chhuak thei turin theihtawp an chhuah a ngai dawn a. Edmund-a hi Mohun Bagan laka Durand Cup 2026 final-a East Bengal tana hattrick siamtu a ni a, David-a pawhin IFA Shield semi final-a NorthEast United 7-2 a an hneh tum khan hattrick a lo siam bawk.
Habas-a hian team chu a duh dan anga khelhtir turin hmanrua a nei tha tawk a. Squad chhah tha tak an neih hian player-te inthlak kual chung pawha result tha hmuh zel a tiawlsam a, a bik takin AFC Champions League Two khelh tur an neih ngaihtuah phei chuan a tangkai hle dawn a ni.
Team dangte nen khaikhin chuan pre-season tha tak an hmang bawk a, ISL trophy chauh ni lo, League Shield la tur pawhin an inrintawk hle ang.
- East Bengal squad:
Goalkeeper: Phurba Lachenpa, Prabhsukhan Singh Gill, Gourab Shaw
Defender: Anwar Ali, Diego Zivulic, Lalchungnunga, Narender Gahlot, Nacho Monsalve, Martand Raina, Jay Gupta, Sandip Mandi, Boris Singh, Mohamad Rakip, Hardik Bhatt
Midfielder: Mohammed Rashid, Jeakson Singh, Rohit Kumar, Souvik Chakrabarti, Vanlalpeka Guite, Danish Farooq, Raynier Fernandes, Dani Ramírez, Asif Khan
Forward: Naorem Mahesh Singh, Vishnu P V, Bipin Singh, Rohit Danu, Chris Ikonomidis, Jesin TK, Ake Loba, Nsungusi Effiong, Edmund Lalrindika, Lukasz Zwolinski, David Lalhlansanga