Emmanuel Lalbuatsaiha’n amah au phurtute beisei tihlawhtlingin Malsawmkima lakah inhnek hautak a pal tlang a, nilaini zanah Mizoram Labour Link LPS Pro Fight lightweight semifinal a lut.
LPS Arena, Falkland-ah Muanna Veng mipuiin an veng tlangval Buatsaiha an thlawp tha hle a, Vaiphai boxer Sawmkima nen inhnehtawk taka round li an inhnek chhungin thahrui an pek belh a, judge pathum point pekah 39-37, 40-36, 39-38-in a chak vek a ni.
Kum 20 mi Buatsaiha hi mixed martial arts khel tura inbuatsaih thin niin a vawi khat nan Pro Fight-ah a tel a, tha taka inveng chungin lehlamin chet an lak hmasak hnuah nawr let thin a ni a, thahrui a neih that avangin fei leh mar takin a khel tluan thei a, a bitumte aiin a tawp lamah a chungnung thei zel a ni.
Kum 22 mi Sawmkima’n round of 16-ah Title Fight-a vawi hnih inlan tawh C Lalhruaitluanga hnek tluin a lehthal a, inrintawkna sang tak nen a tir lamah a hman thiam a vei lamin chiang takin Buatsaih a hnek a, a hnek a nghetin a fel fai a, chak thei turin bul a tan. Mahse, round khatna chanve hnu lamah Muanna Veng fighter-in bei letin hneh takin a nawr zui ve leh a, round li an inbeih chhungin an inhnek nasa a, inchet that chhawkin hmuhnawm takin an innuai a ni.
Buatsaiha’n au phurtu a nei hnem a, round thumna atangin thahrui nei leh tlo zawk a nihna lantirin a hnek fuh a langsar a, hneh sual chhuakin Orient Goldsmith Fighter of the Night-a thlan a ni.
Fly-ah Lawngtlai Vengpui boxer Moses Lalruatfela’n quarterfinal hmun ruak hnuhnung ber luah khatin Maubawk rawlthar Lalhriatzela lakah round li a la vek a, inrinni zanah Selesih tlangval Benjamin Lalrindika nen an intawng ang.
Tawn hriat nei lo huang atanga tlang Hriatzela’n taima takin bei mah se hnek fuh a harsat a, seeded zinga mi Ruatfela’n kutthlak a nain a dik zawk hle a, a ngila a vei leh ding a chhuah zawnin Maubawk rawlthar a tibuai a, rang taka a vei lam a chhuah leh a taksaa a hneksak hmangin lam thamin inhnek a awpbet tluan a ni.
Bantam-ah Pangzawl fighter Ramdinthara’n round tin la vekin West Lungdar tlangval Lalchhuanawma a hneh bawk a, Ramthar North rawlthar beiseiawm Lalrambuatsaiha nen inrinni zan semifinal-ah an inhnek ang.
Kum 25 mi Ramdina’n a ding lamin a hnek fuh zawn nghal a, veikhawr Chhuanawma’n a ngila tha taka a hnek fuh rualin a chhang let zui hman zel bawk a, inhnaih chilhah kut rang leh hnek chhuak hnem zawk a nih bakah dik taka dawmin fuh takin a vai fo a, an inhnek chhungin chak tur khawpin West Lungdar boxer a ngampa tawk lo.
Bantam champion lai Laldinsanga’n champion kawnghren a humhim dawn lo a, 2023 Title Fight-a a hneh loh Dinsanga title kalsan rochun turin Ramdina’n vawi hnih chak zawn a la mamawh a ni.