Mizoram sorkarin October 10 atanga November 30, 2026 thlenga sangha man khapna hun ‘Closed Season’ a puan denchhenin, Lengpui Branch YMA leh Lengpui Model Branch YMA te chuan sangha fuan ven hnatlangpui khuhhawna hun an hmang.
District Fisheries Development Officer (DFDO) Aizawl C. Lallianpuii hova hman he hunah hian Closed Season chhungin YMA Officer Bearer-te khaihruainain group hrang hrangah inthenin, Dialdawk lui leh Lunghmul lui te chu nileng leh zankhuain an veng thin dawn a ni.
Inkhawmnaa thu sawitu C. Lallianpuii chuan sangha mantuten eizawnna kumhlun an neih reng theih nan leh Mizoram mipuiin tualchhung sangha ngei ei tur an neih zel theih nan hian danin a phal hun leh hmanrua dik hmang chauhva sangha man thin a pawimawh thu a sawi a, luia sangha man tur te chuan Fishing License an nei ngei ngei tur a ni tiin a sawi a. Mizoram Fisheries Act 2002 dan zawm lo te chu pawisa chawi leh lung in tan thlengin hrem theih an nih thu a sawi bawk.
DFDO chuan YMA-te chu khawtlang hna pawimawh tak takah an buai hle chung pawha ram hmangaihna leh thahnemngaihna nen Fisheries department thawhpui a, luidung an humhalh thin avangin lawmthu a sawi a, mipui te pawh YMA-te thawhrimna hriatpui a thlawp tlat turin a ngen.
Lengpui a branch hnih te bakah hian Aizawl district chhungah YMA branch 27 dang te chuan luidung hrang hrang an humhalhin an veng reng bawk a ni.