Aizawl: BJP Mizoram chuan Inrinni chawhnu khan Prime Minister Narendra Modi-a’n kum 25 chhung ram tana a hnathawh chanchin lemchan (drama) hmanga entirna hun an hmang.
C. Lalbiakkimi, State Secretary-in a kaihruai inkhawmnaah hian State Vice President JB Rualchhinga chuan thu sawiin, PM Modi-a chu Gujarat Chief Minister a nih atanga hmasawnna hrang hrang kalpuitu leh kum 2014-a Prime Minister a nih hnuah ram hmel a thlak danglam nasa hle a ni tiin a sawi.
JB Rualchhinga chuan PM Modi chu mi rethei chhungkua atanga seilian a nih avangin mi retheite dinhmun a hriatthiampui hle a, Jal Jeevan Mission, PMAY, Swachh Bharat, Ayushman Bharat leh PM-KISAN te bakah hmeichhia leh thalaite tan scheme tha tak tak a siamsak a, mipuite tana Prime Minister tha ber a ni tiin a fak bawk.
PM Modi-a hmalakna avanga ram chhungah hmasawnna thlen a nih dan tar langin, tunah chuan India chu khawvel ram changkang te’n an entawn UPI online transaction te neiin, satellite leh rocket te pawh mahni ram siam ‘Make in India’ hmangin economy-ah nasa takin hma a sawn chho ta zel a ni, a ti.
“Narendra Modi Untold Stories” tih thupui hmanga hman he inkhawm hian lemchan hmuhnawm tak entir a ni a, he hunah hian State Secretary Lalrinkima chuan lawmthu sawina hun a hmang bawk a ni.