Aizawl: Mizoram Police chuan Cyber Crime-a mipui leh sumdawngte harsatna tawh thin chin fel leh venhim kawnga chak zawka hma lak a nih theih nan Mizoram Police Cyber Crime hnuaiah Cyber Crime Coordination Unit hran a din.
July 27, 2026 khan State Cyber Crime Coordination Centre (S4C) chu Mizoram Police hnuaia unit hran angin din niin, Cyber Crime dona kawnga hma lak ngai hrang hrang – chhuina, zirchianna, mipui zirtirna, social media vil hna leh emergency-a chet vat dan te buaipui tura ruahman a ni.
Cyber Crime Coordination Unit hnuaiah hian inbumna hmanga sum inlak sak hmuh kir leh theihna Money Restoration Module siam a ni a, he module hmang hian sum thahnem tak hmuh let a ni tawh a ni.
Hemi bakah hian social media-a zahmawh rawngkai leh dan phal loh thil post chungchangah te hma lak a nih avangin, internet kaltlanga pawikhawhna hrang hrangah chak zawka hma lak a nih theih nan state dang Police te nen pawh thawhhona tha tak an neih zel thu Mizoram Police hotute chuan an sawi bawk.
Hetih lai hian, Mizoram Police chuan kum 2026 chhungin cyber crime tuarte hnenah Rs 1,06,44,416 an pe kir tawh a. Kumin chhung hian Cyber Crime Police Station ten cyber criminal mi pakua an man tawh bawk.