Aizawl: Aizawl Traffic Police chuan Inrinni zan dar 9 atanga Pathianni khawvar dawn thleng khan Aizawlah ‘Zan Special Drive’ huaihawtin, dan bawhchhia mi 76 an man.
Dan bawhchhia man zingah hian driving license nei lova lirthei khalh mi 24 an awm a, tlan phal loh zawnga tlan mi 12, helmet khum lova two-wheeler khalh paruk leh rui chunga lirthei khalh mi pali an tel a. Heng bakah hian lirthei ri bengchheng nei mi pahnih leh dan bawhchhiatna dang avanga man mi 28 an awm tel a ni.
Aizawl Traffic Police chuan khawpui himna leh lirthei chetsualna bakah dan bawhchhiatna titlem turin theihtawp an chhuah zel dawn tih sawiin, hetiang drive hi a tul angin a kalpui zel dawn a, mipui leh lirthei khalhtute chhun leh zan lamah pawh traffic dan leh hraite tha taka zawm thin turin an chah. Duty awm remchan lohna hmuna dan bawhchhia leh mi dang tana harsatna thlen thinte hmu a awm chuan Traffic Control Room (9366553559 leh 0389-2313061)-ah hriattir vat thin turin an ngen bawk.