India-a eptu party-te chuan Thawhtanni khan electoral roll atanga mi maktaduai tel hming paih an duh lohzia lantir nan Supreme Court panin kawng an zawh a, he thil hian Indian khawpuiah hian ni tam tak buaina thlen tawhin Prime Minister Narendra Modi-a sorkar tan pawh hmachhawn khirh tak an ni mek.
Eptu party-te leh thalai, Cockroach Janta Party (CJP) movement thlawptute chu tun thla chhung hian Chief Election Commissioner (CEC) Gyanesh Kumar-a chu tun hnaia electoral roll ennawnah Modi-a kaihhruai BJP tana hlawkpui theih tura thil kalpuiah puhin bâng tura nawrin ni tin deuhthaw an thawk chhuak.
Electoral roll ennawn, special intensive revision (SIR) hi nikum atanga kalpui tan niin hming maktaduai 130 chuang, Japan mipui aia tam paih niin heng zinga maktaduai 28 hi thi tawh an ni a, maktaduai 63 chu insawn niin maktaduai 30 chu an chin hriat chhuah zawh tawh lohte an ni.
Police chuan kar tawpah khan CJP hruaitu leh a thlawptute telin mi za tel an man a, Delhi laili chu venhimna khauh taka kalpui niin kharkhip ang mai a ni.
Election Commission of India (ECI) chuan party tan bik emaw, dik lo taka voter paih leh dah luh emaw an awm lo tih an sawi a. BJP pawhin an rama mipui rorelna nghet tak awm chu dik lo taka sawiselah an puh bawk.
Eptu party-te hi Chief Justice Surya Kant-a’n a hmuh theih loh hnua Supreme Court-a petition thehluh tuma kal an ni.
Kant-a chuan hemi chungchang hi a hmain court-ah thlen a ni tawh a, thubuai tihkhawtlai (pending) mek ngaihtuah chu court rorelna kalhmang bawhchhiatna a ni dawn nia awiin eptute chu petition thehlut zawk turin a ti a ni.
Thawhtanniah khan eptu party mi leh left-wing zirlai pawl tam tak telin court panin an kal a, an hruaitute erawh bus-in an kal thung.
“He ramin dan ang taka hlutna a neihte chu suasam mek a ni a, a institution-ten mahnia a hrana thuneihna an neih pawh an hloh ta a… Hei hi ka duh lo a ni,” tiin Anirudh Siyag, PhD student chuan a sawi.
Thuneitute chuan darkar 10 chhungin metro station paruk an khar a, kawngpui lian 20 chuanga lirthei kal vel pawh khuahkhirh a ni.
Delhi lailiah anti-riot gear nen venhim hna thawktu za rual duty-tir an ni a, kawngpui pawimawhte dan niin water cannon an inchhawp bawk.
BJP chuan lungawi lohna lantir chungchangah hian eptu party lian ber, Congress party chu thuneihna pheh thlak tumah an puh.
“Danpui hnuaia institution rinhlelhawma chhuahin, khawlaiah buaina an siam a, politic hming vuahin mipui an bei a, heng zawng zawng thuneihna chan tuma an beihna mai mai a ni,” tiin Agriculture Minister Shivraj Singh Chouhan-a chuan thuthar lakhawmtute hnenah a sawi.
Delhi Police chuan Jantar Mantar chu sumdawnna hmun lun ber district a ni a, tunah rih chuan ‘lungawi loh lantirhna hmun’ (protest site) a ni tawh lo va, hmun dang pathum thar an ruahman tih thupek an chhuah.
Jantar Mantar-ah hian CJP chuan kumin kum tir lam khan thil nawr lian tak an lo huaihawt tawh a, Education Minister Dharmendra Pradhan-a chu exam zawhna put avangin bâng turin an nawr a, an nawr hlawhtling.
CJP hruaitute hian a hranpain Delhi Police chu hmuin muanawm taka nawrh huaihawtna tur an thlen a. a ni hi an tichiang thuai dawn tih an sawi.
Thalai pawl chak tak ni thar mek hi tun hnaiah thil chi hrang hrangah sorkar dik lohna thil an bei nasa a. Heng zingah hian sorkar sikul hmunhma leh thil neih chhe lutukte pawh a tel a, tunah hian kum 12 chhung rorel tawh, Modi-a leh BJP tan hmachhawn hautak tak an ni mek.
India-a boruak tang tak awm mek hi Indian Express chanchinbuin thla hmasaa CEC Kumar-a chu a thachhangdawltu pahnihten electoral roll ennawn kaihhnawihah an hnial tih an tar lan atangin a ni.
Eptu party-te chuan Muslim leh hnam leh sakhaw zuitu tlem zawk, Hindu nationalist rorel lai party thlawp lo tur nia ngaihte paih an ni nasa bik niin an sawi a, ECI leh BJP chuan a ni bik lo tih an sawi thung.