Aizawl: West Bengal-a Darjeeling district chhunga Panitanki (Indo-Nepal border)-ah Mizo hmeichhia, kum 17 mi pahnih chu mihring hmanga sumdawn (trafficking) tumna chu Sashastra Seema Bal (SSB) leh child protection NGO-te thawh hona avangin man chhuah a ni a. Hemi chungchanga inrawlha puh Ahmedabad mi, kum 61-a upa pakhat man a ni.
Thudawn danin, man tak mipa hian Nepal-a casino-a hna thawk tura tiamin nula pakhat hi hruai a tum a, October 11 tlai khan SSB te leh Kosi Lok Manch (Just Rights for Children network partner) te’n ramri-ah an lo nangching a. Nula hian nu leh pa nei tawh lo a nih thu leh he mipa hi an chhungkaw thian hlui anga a hriat thu a sawi a ni.
Mipa an zawhchianna atangin, Mumbai leh Pune-ah spa centre engemaw zat a enkawl mek thu a sawi a. Mumbai-a a spa pakhata hnathawk hmeichhe pakhatin he hmeichhe naupang, hna zawng mek hi a hmelhriattir nia sawiin, he hmeichhe naupang leh mipa hi thla khat vel an cheng dun tawh a, casino-a hna thawk tur tih hmangin Nepal-ah hruai a tum a ni. A phone endikna atangin naupang kum tling lo taksa pholang leh rawng taka sawngbawlna (CSEAM) thlalak leh video chi hrang hrang hmuh a ni bawk.
Indo-Nepal ramria an man chhuahna atang hian Siliguri-a a inah Mizoram nula kum 17 mi dang pakhat inchhung hnathawk tura dah a awm tih hriat chhuah a ni a. Bhakti Nagar Police Station puihnain he nula pahnihna hi va chhanchhuah a ni bawk.
Kharibari Police Station-ah BNS, POCSO Act, Immoral Traffic (Prevention) Act leh IT Act hnuaiah thubuai ziah luh a ni a, police-in tihfel ngaite an tihfel zawh hnuah Mizo hmeichhe pahnihte hi Child Welfare Committee (CWC) hmaah hruai an ni.