Aizawl: Mizoram mipuiin state pawna damdawi in an pan nasat leh rin rawn ber zinga mi Christian Medical College (CMC), Vellore chuan Mizoram Universal Health Care Scheme (MUHCS) a zawm a, Thawhtanni khan Health Minister Lalrinpuii hoin Aizawlah inremna (MoU) ziah a ni.
He inremna avang hian Mizoram mipuite, a bikin natna khirh bik veite chuan bill chawi hmasak ngai lovin enkawlna an dawng thei tawh dawn a ni.
MUHCS 1.0 atang khan CMC Vellore hi empanel tuma dawr an ni thin a. Re-imbursement system lo chuan an kal theih loh thu chauh chhanna dawn a ni thin a. Health Minister Lalrinpuii chuan kalphung thar a rintlak thu leh sorkarin bill pekchhuah tlai lova a kalpui thin dan te, state pawna hospital dangte pawhin harsatna an neih loh dante a sawipui a, inbiakna kalpui chhunzawm leh theih a ni ta a. Damlo, a bikin natna khirh bik leh damdawi in lian mamawh te tana tangkai taka cashless-a an inenkawl zui theihna tura inremna ziah chu an lo remti thei ta a ni.
CMC Vellore hotute chuan Mizoram Health Care Scheme chu sorkar hnathawk te chauh ni lo, mi rethei berte thleng phak a nih avangin tha an tih thu leh thawhho an chak thu an sawi a. CMC hi Mission mode-a kal a nih angin damlo tanpui ngai te tana theihtawp chhuah zel an inhuam thu sawiin, Chennai Airport atanga darkar hnih lek chhunga a thlen theih tak avangin kawng engkimah inkalpawh a awlsam tak thu an sawi bawk.
Health Minister Lalrinpuii chuan CMC Vellore-a enkawlna man chu damdawi in dang te aiin a tlawmfal tih sawiin, Mizoram mipuite leh sorkar tan a tangkai dawn tih a sawi.
He MoU hi sorkar aiawhin Lalzarmawii, IAS, Commissioner & Secretary; H. Lalhruaitluanga, Under Secretary (H&FW) leh Dr. Lalbeiseia Renthlei, Programme Manager (MSHCS) ten an ziak a. CMC Vellore aiawhin Director Dr. Biju George, Medical Superintendent Dr. Rajesh I leh Associate Director (Finance) Dr. Selvamani B. ten an ziak ve thung.