Aizawl: Mizorama buatsaih, Northeast Bankers’ Conclave-in state hmasawnna atan kawng thar tam tak a hawng dawn tih Union Minister for Communications leh Development of North Eastern Region (DoNER) Jyotiraditya M. Scindia chuan a sawi.
Ni hnih cham tura Mizoram tlawha zin, Union Minister Scindia hi Thawhtanni khan Lengpui Airport-ah tumin, a thlen hlima chanchinbu mite a kawmnaah Mizoram hian sector hrang hrangah hmasawnna thleng thei tur kawng tam tak a nei tih a sawi a. Prime Minister Narendra Modi kaihhruaina hnuaia sorkar laipui thil thlir lian tak Vikshit Bharat 2047 tihpuitlinna atan Mizoram hian chanvo pawimawh tak a nei tih a sawi bawk.
Union minister chuan nimina hawn tura ruahman project hrang hrang Rs vbc 350 hu velte chuan Mizoram chhunga hmasawnna kawngah danglamna lian tak a thlen ngei a rin thu a sawi a ni.
Northeast Bankers’ Conclave hian entrepreneur-te leh micro, small leh medium enterprise (MSME) din tumte tana bank kaltlanga a pung hniam leh awlsam zawka sum an puk zung zung theih dan tur kawng hrang hrang a ngaihtuah dawn tih sawiin, hei hian state chhunga kuthnathawktute tharchhuah nasa takin a puntir dawn tih a sawi.
Mizorama oil palm chin chungchang pawh sawiin, Scindia chuan oil palm chin belh zelna atan hmun leh hma a la zau hle tih a sawi a. Bankers’ Conclave-ah hian kuthnathawktuten oil palm tharchhuah atanga hlawkna leh sum fai tam zawk an hmuh theih dan tur te ngaihtuaha sawi ho a nih thu a sawi bawk.